Lögfræðingar Blatter ráðlögðu honum að halda sig heima

Sepp Blatter, forseti FIFA, er ekkert á förum frá heimalandi sínu á næstunni eftir að lögfræðingar hans ráðlögðu honum að ferðast ekki út fyrir landamæri Sviss.

BBC segir frá því í dag að lögfræðingar Sepp Blatter í Bandaríkjunum hafi mælt með því að nýendurkjörinn forseti FIFA sleppi því að fara í hinar ýmsu boðsferðir utan Sviss sem bjóðast æðsta yfirmanni heimsfótboltans.

Ástæðan er rannsókn á spillingarmálum innan Alþjóðaknattspyrnusambandsins sem er enn í fullum gangi. Þegar hafa ákærur og sláandi staðreyndir komið fram í dagsljósið um sóðaleg peningamál innan FIFA en margir erlendir fjölmiðlar eru þó á því að fleiri kærur og fleiri óhreinir FIFA-menn eigi eftir að koma fram áður en málið verði leitt til lykta.

Blatter hætti við á dögunum að fara til Moskvu í Rússlandi í tilefni þess að þúsund dagar eru í að HM í fótbolta hefjist í landinu. Sú ákvörðun að láta Rússland halda HM 2018 er ein af þeim ákvörðun sem eru til rannsóknar vegna mögulegrar mútuþægni.

Sú ákvörðun að fara ekki til Moskvu tengist því þó ekki að Blatter hafi óttast það að vera handtekinn í Rússlandi og framseldur til Bandaríkjanna enda enginn framsalsamningur í gildi á milli landanna.

Alþjóðaknattspyrnusambandið er að "taka til" innan sinna raða eftir áfallið í vor og Sepp Blatter sjálfur er að vinna í því máli. Það virðist vera stefna sambandsins að starfsmenn FIFA gefi ekki færi á sér á opinberum viðburðum á meðan að sú vinna er í gangi.

Nánir samstarfsamenn Sepp Blatter hafa líka áhyggjur af heilsu þessa 79 ára gamla Svisslendings sem hefur verið forseti FIFA frá árinu 1998. Það eru því fleiri ástæður að karlinn ferðast ekkert þessa dagana.