Háskólinn í West Virginia uppgötvaði dísilvélasvindl Volkswagen

Það voru tveir prófessorar og tveir nemendur í West Virgina háskólanum í Bandaríkjunum sem uppgötvuðu dísilvélasvindl Volkswagen í fyrra. Markmið þeirra var að kanna að sönnu þann útblástur sem stafaði af evrópskum dísilbílum sem seldir voru í landinu.

Þeir voru útbúnir hátæknibúnaði sem gat mælt útblásturinn í hefðbundnum akstri. Völdu þeir 3 bílgerðir til prófana, Volkswagen Jetta, Volkswagen Passat og BMW X5. Óku þeir bílunum langar vegalengdir, engum þeirra minna en 1.500 mílur, eða 2.400 kílómetra og Volkswagen Passat bílnum óku þeir 3.200 km.

Þegar akstrinum var lokið voru þeir forviða yfir útblæstri bílanna, ekki síst Passat bílsins sem átti að vera útbúinn fullkomasta búnaðinum til að hindra NOx útblástur. Hann mældist hinsvegar með 20 sinnum meiri útblástur en California Air Resources Board hafði mælt bílinn á hefðbundnum staðbundnum mælitækjum, en á þeim stendur bíllinn kyrr og þá virkjar svindlhugbúnaðurinn og kveikir á mengunarvörninni. Þegar bílnum er svo ekið á hefðbundinn hátt slekkur hann á henni og við það eykst afl bílsins.

Volkswagen Jetta bíllinn kom enn verr út en Passat bíllinn, með 30 sinnum meiri útblástur, en BMW X5 bílinn mældist eins og í fyrri mælingum. Prófessorarnir og nemendurnir áttu alls ekki von á því að Volkswagen væri að svindla á útblásturtölunum og því vakti þessi niðurstaða þeirra mikla furðu þeirra. Því létu þeir yfirvöld vita af þessum mælingum þeirra og við það fór boltinn að rúlla.