Farþegar Primera Air bíða enn svars vegna bóta

Farþegarnir sem voru í vél Primera Air á leið frá Tenerife á Spáni til Keflavíkur í ágúst síðastliðnum bíða enn eftir svari frá flugfélaginu vegna bóta sem þeir hafa krafist vegna tafa sem urðu á fluginu.

Um 150 Íslendingar voru í vélinni sem átti að lenda á Keflavíkurflugvelli að kvöldi sunnudagsins 26. ágúst síðastliðinn. Við brottför frá Spáni var farþegunum tilkynnt að vélin væri mjög þung og því þyrfti að millilenda á Shannon-flugvelli á Írlandi til að taka eldsneyti.

Sömuleiðis var tilkynnt að veðurspáin á Norðurlandi væri slæm og því væri ekki hægt að treysta á Akureyrarflugvöll sem varaflugvöll. Í aðdraganda lendingarinnar var farþegum sagt að það tæki um tuttugu mínútur að fylla vélina.

Við tók tveggja tíma bið á Shannon-flugvelli þar sem kom í ljós að áhöfn vélarinnar hafði unnið of lengi og mátti ekki halda áfram án lágmarkshvíldar. Var því tekin sú ákvörðun að koma farþegunum fyrir á hóteli og var áætluð brottför daginn eftir. Seinkun varð því á fluginu daginn eftir og er talið að eiginleg töf á þessu ferðalagi hafi verið um átta klukkustundir því vélinni seinkaði einnig frá Tenerife.

Frá því farþegarnir lögðu af stað frá Tenerife og voru lentir á Keflavíkurflugvelli liðu um 26 klukkutímar en ef allt eðlilegt á ekki að taka nema um rúmlega fimm stundir að fara þessa leið með flugvél.

Eiga fastsett lágmarksréttindi

Farþegarnir hafa margir hverjir sent flugfélaginu kröfubréf þar sem óskað er eftir bótum vegna tafa, en farþegar eiga fastsett lágmarksréttindi samkvæmt Evrópureglugerð ef þeim er neitað um far, flugi aflýst eða seinkun verður á flugi.

Er litið á það þannig að flugfélög hafa um 4 til 6 vikur til að bregðast við slíkum kröfum farþega. Ef flugfélagið verður ekki við kröfum farþega eða hunsar að svara bréfinu stígur Samgöngustofa inn í málið. Um þrjár vikur eru liðnar síðan fyrsta bréfið barst Primera Air frá farþegum þessa umrædda flugs þannig að enn gæti liðið einhver tími þar til brugðist verður við körfum farþeganna.

Evrópureglugerð númer 261  tekur til farþega í áætlunarflugi og leiguflugi á ferðalagi innan EES-svæðisins, svo og farþega sem leggja upp frá þriðja landi inn á EES-svæðið. Farþegi sem ferðast utan EES á réttindi skv. alþjóðasamningum sem flestar þjóðir eru aðilar að. Framkvæmd þeirra byggir í grunninn á því að farþegi þarf að sýna fram á tjón til að fá það bætt.

Gætu átt von á 87 þúsund króna bótum

Samkvæmt henni eiga farþegar rétt á bótum ef:

A) Flugi seinkar um tvær klukkustundir eða meira í 1.500 kílómetra flugi eða styttra.

B) Flugi seinkar um þrjár klukkustundir eða meira í flugi innan Evrópubandalagsins sem er lengra en 1.500 kílómetrar og í öllu öðru flugi á bilinu 1.500 til 3.500 kílómetrar.

C) Ef flugi seinkar um fjórar klukkustundir eða meira í flugi sem fellur ekki undir A- eða B-lið.

Bæturnar miðast við eftirfarandi:

A) 250 evrur, um 36 þúsund krónur miðað við gengi dagsins, fyrir öll flug sem eru 1.500 kílómetrar eða styttri.

B) 400 evrur, tæpar 58 þúsund krónur miðað við gengi dagsins, fyrir öll flug innan Evrópubandalagsins sem eru lengri en 1.500 kílómetrar og fyrir öll önnur flug á bilinu 1.500 og 3.500 kílómetrar.

C) 600 evrur, tæpar 87 þúsund krónur miðað við gengi dagsins,  fyrir öll flug sem falla ekki undir A- eða B-lið.