Össur um Stjórnstöð ferðamála: „Örugglega eitthvað rotið á ferðinni“

Össur Skarphéðinsson, þingmaður Samfylkingar og fyrrum ráðherra, segir að Stjórnstöð ferðamála, sem Ragnheiður Elín Árnadóttir iðnaðarráðherra kynnti til leiks í liðinni viku, leysi á engan hátt strúktúrvanda ferðaþjónustunnar. Enn séu öll grundvallaratriðin jafnóleyst og áður, s.s. um gjaldtöku fyrir aðgengi.

Til staðar nú þegar sé Ferðamálastofa sem sinni lögbundnum verkefnum á sviði ferðamála. Nú bætist við Stjórnstöð ferðamála og óljóst er hvernig stofnanirnar tvær eigi að vinna saman eða verkaskipting verði þeirra á milli.

„Það virðist vera að í stað þess að taka vel til í rekstri stofnana, þá er verkum úthýst með nýrri stofnun eða nýju apparati, þetta er er mjög víðsjárvert þegar við leggjum allt kapp á að sýna ráðdeild og sparnað í rekstri,“ sagði Vigdís í Morgunvaktinni á Rás 1 í morgun.

„Þegar við Vigdís Hauksdóttir föllumst í faðma og erum innilega sammála er örugglega eitthvað rotið á ferðinni,“ segir Össur í færslu á Facebook í morgun. Þingmaðurinn hefur verið gagnrýninn á störf Ragnheiðar Elínar og kallar nýjasta útspil hennar „enn eitt flopp“ ráðherrans.

Enn eitt 'flopp“ Ragnheiðar Elínar Þegar við Vigdís Hauksdóttir föllumst í faðma og erum innilega sammála er örugglega...

Posted by Össur Skarphéðinsson on Monday, October 12, 2015

„Það var tær snilld hjá henni að leysa vandamál ferðaþjónustunnar í eitt skipti fyrir öll með því að búa til nýja ríkisstofnun, Stjórnstöð ferðamála. Það þarf sérstakan brilljans til að koma auga á að einfaldasta lausnin var vitaskuld að koma á fót nýrri stofnun við hliðina á Ferðamálastofu, sem Ragnheiður stýrir hvort eð er líka,“ sagði Össur í síðustu viku.

„Það þarf að lágmarki tvær ríkisstofnanir til sinna þessu sama en erfiða verkefni. Ef tvær duga ekki má alltaf stofna þá þriðju. Ég geri að tillögu minni að landsfundurinn verðlauni Ragnheiði Elínu með því að kjósa hana „starfsmann mánaðarins“ þó ekki væri nema fyrir að hafa sýnt í verki hvað Sjálfstæðisflokkurinn á við með slagorðinu „Báknið burt.“

Það er aðdáunarvert hvernig Ragnheiður Elín ferðamálaráðherra nær að brillera viku eftir viku. Það var tær snilld hjá...

Posted by Össur Skarphéðinsson on Wednesday, October 7, 2015

Þá hefur ekki síður verið gagnrýnd sú ákvörðun að skipa Hörð Þórhallsson sem framkvæmdastjóra Stjórnstöðvarinnar. Starfið var ekki auglýst en starf hans er til sex mánaða hið minnsta. Laun hans eru 1950 þúsund krónur á mánuði sem eru með því allra hæsta sem gerist hjá starfsemi á vegum ríkisins. Er um verktakagreiðslu að ræða.

Athygli vekur að Hörður hefur enga starfsreynslu á sviði ferðamála en hann var áður framkvæmdastjóri hjá Actavis.

„Það eina sem er þó kýrskýrt er að Stjórnstöðin verður rekin af flokksbróður ráðherrans og landsfundarfulltrúa Sjálfstæðisflokksins sem vitaskuld var ráðinn án auglýsingar. Fyrir það fær flokksbróðirinn 2 milljónir á mánuði. Það er nokkuð vel í lagt í ljósi þess að hann þekkir hvorki haus né sporð á ferðamálum en er hins vegar sérfræðingur í markaðssetningu hermilyfja!“

Vísar Össur til þess að samkvæmt heimildum Stundarninnar er Hörður á leið á landsfund Sjálfstæðisflokksins sem aðeins flokksmenn mega sitja. Þá birtir Stundin mynd frá árinu 2013 þar sem Hörður sést á snæðingi með Kjartani Magnússyni, borgarfulltrúa Sjálfstæðisflokksins, Haraldi Johannessen, ritstjóra Morgunblaðsins, og Þórði Þórarinssyni, framkvæmdastjóra Sjálfstæðisflokksins. Þrátt fyrir það neitar Hörður fyrir tengsl við flokkinn.

Uppfært klukkan 13:45

Kjarninn greinir frá því að Hörður þvertaki fyrir að vera á leiðinni á landsfund Sjálfstæðisflokksins.

Uppfært klukkan 18:27

Rétt er að halda því til haga að Hörður fær greitt sem verktaki en ekki launþegi.