Davíð Örn og Ívar Örn framlengja við Víking

Davíð Örn Atlason og Ívar Örn Jónsson, leikmenn Víkings, hafa báðir framlengt samninga sína við félagið til tveggja ára. Báðir eru þeir fæddir árið 1994. Þetta kemur fram í fréttatilkynningu frá félaginu.

Davíð Örn er uppalinn hjá félaginu, en hann er hluti af sterkum 94-árgangi Víkings sem skilaði einnig af sér Viktori Jónssyni (næst markahæsta leikmanni 1. deildar í sumar) og Aroni Elís Þrándarsyni, atvinnumanni hjá Álasundi í Noregi. Allir voru þeir hluti af U21 árs landsliði Íslands í sumar.

Davíð Örn kom við sögu í öllum 22 leikjum Víkings í Pepsi-deildinni í sumar. Hann skoraði þrjú mörk og lagði upp önnur fimm eftir að vera á láni hjá Dalvík/Reyni árið áður þangað sem hann fór til að komast í gang eftir meiðsli.

Ívar Örn kom til Víkings frá HK fyrir tveimur árum síðan og spilaði 20 leiki í Pepsi-deildinni í sumar. Ívar Örn skoraði fimm mörk fyrir Víking í deildinni, en hann hefur nú í heildina spilað 47 leiki fyrir liðið í tveimur efstu deildum Íslandsmótsins og skorað sex mörk.

Davíð og Ívar geta báðir leikið sem bakverðir og miðjumenn og voru báðir valdir í U21 árs landslið Íslands í sumar sem er efst og ósigrað á toppi síns riðils í undankeppni EM 2017.

„Það er okkur mikil ánægja að framlengja samninga þessara ungu og efnilegu leikmanna sem við ætlum stóra hluti í framtíðinni,“ segir Heimir Gunnlaugsson, varaformaður knattspyrnudeildar Víkings.