Tveir Grindvíkingar heltust úr lestinni hjá kvennalandsliðinu

Tveir leikmenn geta ekki tekið þátt í fyrstu leikjum íslenska kvennalandsliðsins í körfubolta í undankeppni EM 2017 en þær voru hluti af fimmtán manna upprunalega æfingahópi Ívars Ásgrímssonar fyrir leiki við Ungverja og Slóvaka.

KKÍ segir frá því á heimasíðu sinni í dag að Grindvíkingarnir Björg Guðrún Einarsdóttir og Petrúnella Skúladóttir hafi orðið að segja sig úr hópnum vegna meiðsla. Petrúnella hefur ekki verið með í síðustu leikjum Grindavíkur og Björg Guðrún Einarsdóttir var heldur ekki með á móti Val í gær.

Petrúnella Skúladóttir hefur fengið tvö höfuðhögg á stuttum tíma og má ekki spila af þeim sökum en Björg Guðrún er að glíma við meiðsli á mjöðm.

Grindavíkurstelpunum tókst að vinna 66-63 sigur á Val þrátt fyrir að vera án þeirra Petrúnellu og Björgu en það var landsliðskonan Sigrún Sjöfn Ámunadóttir sem skoraði sigurkörfuna í leiknum.

Íslenska kvennalandsliðið hóf æfingar í morgun og verða við æfingar næstu daga. Liðið æfir aftur í kvöld og áfram tvisvar á dag fram að brottför á fimmtudaginn.