Benítez öruggur hjá Real Madrid í bili

Florentino Pérez, forseti Real Madrid, lýsti yfir fullum stuðningi við Rafel Benítez, þjálfar liðsins á blaðamannafundi í kvöld.

Real boðaði til fundarins eftir 4-0 tap liðsins gegn Barcelona í El Clásico á laugardagskvöldið, en margir stuðningsmenn Real kalla nú eftir höfði Benítez.

Real missti Barcelona sex stigum á undan sér á toppi deildarinnar með tapinu, en þar á bæ þykir ekki boðlegt að tapa heima gegn erkifjendunum svona illa.

„Við héldum stjórnarfund og greindum stöðuna hjá Real Madrid. Rafa hefur allan okkar stuðning og traust,“ sagði Pérez á fundinum í kvöld.

„Rafa Benítez hefur allt sem þarf til að þjálfa Real Madrid og var bara að byrja hérna. Við verðum að leyfa honum að halda áfram og reyna að ná sínum markmiðum,“ sagði Florentino Pérez.