Rasmus Christiansen genginn til liðs við Val

Danski miðvörðurinn Rasmus Steenberg Christiansen skrifaði í dag undir tveggja ára samning hjá Val en hann gengur til liðs við bikarmeistarana eftir aðeins eitt ár í herbúðum KR.

Rasmus sem lék í þrjú ár með ÍBV gekk til liðs við KR síðasta vor eftir tvö ár í herbúðum Ull/Kisa í Noregi. Rasmus lék 17 leiki í öllum keppnum með KR á síðasta tímabili en hann fékk heimild til að ræða við önnur félög eftir að Indriði Sigurðsson sneri aftur til KR.

Rasmus tekur því sæti landa síns, Thomas Guldborg Christensen, í hjarta varnarinnar hjá Val en hann var nokkuð brattur eftir undirskrift í samtali við heimasíðu Vals.

„Valur hefur verið á uppleið síðustu ár, leikstíllinn hefur breyst og mér líkar vel við stefnuna sem félagið er að taka. Ég vonast til þess að félagið haldi áfram á uppleið og að ég geti tekið þátt í því. Markmiðið hjá mér er að berjast við toppinn og ég held að liðið sé nægilega gott til þess,“ sagði Rasmus en viðtalið má sjá hér fyrir neðan.