Hátt í 5000 manns skoruðu á Útlendingastofnun

Undirskriftir 4.569 Íslendinga voru afhentar Útlendingastofnun í dag með áskorun um að hjónin Wael Aliyadah og Feryal Aldahas og dætur þeirra tvær frá Sýrlandi fái hér dvalarleyfi. Toshiki Toma, prestur innflytjenda, fór fyrir undirskriftasöfnuninni.

„Við erum að mótmæla þessari ákvörðun sem Útlendingastofnun tók fyrir fjölskylduna, því þau eru með lítil börn, þriggja ára og fjögurra ára stelpur. Aðstæður í Grikklandi eru mjög slæmar og henta ekki svona litlum börnum. Okkur finnst sem þetta sé mjög ómannúðlegt," segir Toshiki.

Kunna vel við sig í kuldanum

Með undirskriftunum til Útlendingastofnunar er farið fram á að málið fái efnislega meðferð. Málið er nú fyrir kærunefnd útlendingamála og alls óvíst um niðurstöðu þess. Eins og staðan er núna er fjölskyldan því í biðstöðu og verður að óbreyttu send aftur til Grikklands.

Þau hafa nú verið á Íslandi í fimm mánuði og láta vel af dvölinni í vetrarríkinu. „Ég kem frá heitu landi en þið búið á landi íssins. En mér finnst það bara jákvætt, okkur líður vel hér,"segir fjölskyldufaðirinn Wael Aliyadah.

Íbúðin þeirra er nú orðin heimilisleg og skreytt í tilefni jólanna. Þau hjónin segja Íslendinga hafa sýnt þeim mikinn hlýhug, enda hafa þeim borist hlýjar kveðjur og jólagjafir fyrir stelpurnar, sem eru á leikskóla. Foreldrarnir sækja íslenskunámskeið, en þau viðurkenna að þeim leiðist biðstaðan því þau vilja gjarnan vinna.

„Ég vil fá vinnu, ég og konan mín bæði. Okkur líkar ekki að hanga heima allan daginn, það gerir mann brjálaðan, við þurfum að hafa eitthvað við að vera, meira líf. Ég meina, já við erum í yndislegu landi og öruggu landi, það er fyrir öllu, en við viljum fá að vinna. Núna er okkur ekki leyft það, vegna kerfisins, en við viljum gera eitthvað gagn."

Enginn tók formlega við undirskriftunum

Þau óttast að þurfa að búa á götunni og verða viðskila við börn sín verði þau send aftur til Grikklands. Íslensk stjórnvöld hafa viðurkennt að Grikkland teljist ekki öruggt land fyrir hælisleitendur.

Forstjóri Útlendingastofnunar var ekki viðstaddur í dag og var enginn sendur í hennar stað til að taka á móti áskoruninni. Hjónin tóku því einfaldlega númer og biðu eftir að þjónustufulltrúi gæti afgreitt þau .