Aníta hefur byrjað fjögur ár í röð á því að setja Íslandsmet

Aníta Hinriksdóttir er enn bara 18 ára gömul (á nítjánda ári, fædd 1996) þrátt fyrir að hún hafi verið að setja Íslandsmet í fullorðinsflokki undanfarin fjögur ár. Það þýðir jafnframt að í hvert skipti sem hún bætir Íslandsmet fullorðinna þá falla aldursflokkametin að sjálfsögðu í leiðinni.

Þegar Aníta setti Íslandsmetið í 800 metra hlaupinu á Meistaramóti Íslands í Kaplakrika um helgina náði hún tíunda margfalda meti sínu í greininni, það er met sem nær yfir þrjá aldursflokka eða fleiri. Metið sem var einnig Evrópumet unglinga var þrefalt Íslandsmet, Íslandsmet fullorðinna, Íslandsmet hjá 18 og 19 ára stúlkum og Íslandsmet hjá 20 til 22 ára stúlkum.

„Það var mjög sterkt að fá þessa bætingu núna því við erum að fara á tvö mjög stór mót og það er gott að hún finni og viti að æfingarnar séu að ganga vel. Það eykur sjálfstraustið að geta sýnt það í verki á brautinni,“ segir Gunnar Páll Jóakimsson, þjálfari Anítu.

Aníta hefur nú byrjað fjögur ár í röð á því að setja nýtt Íslandsmet fullorðinna í sinni bestu grein í janúar eða febrúar en fyrir uppkomu Anítu var metið búið að standa óhaggað í 34 ár, 10 mánuði og 25 daga.

„Hún hefur skapað sér nafn meðal þeirra bestu síðustu tvö árin. Hún sló í gegn 2013 og hefur verið í kringum fimmtugasta sæti á heimslista fullorðinna síðustu tvö ár. Það er mjög gott sem unglingur,“ segir Gunnar Páll.

Aníta hefur nú bætt innanhússmetið um næstum því átta sekúndur í fimm stökkum en hún bætti metið tvisvar sinnum 2013.

Hún setti fyrsta metið í janúar 2012 (2:05,96 mínútur), en svo hafa fylgt met í janúar 2013 (2:04,79 mínútur), febrúar 2013 (2:03,27 mínútur), janúar 2014 (2:01,81 mínútur) og loks í febrúar 2015 (2:01,77 mínútur).

„Þetta hefur bara gengið eins og við vonuðumst eftir. Þetta er síðasta árið hennar í unglingaflokki og hún kemur til með að keppa á Evrópumeistaramóti unglinga í sumar. Það er síðasta unglingamótið og um leið og hún er að fara upp úr unglingaflokki þá er hún orðin vel gjaldgeng í keppni þeirra bestu í fullorðinsflokki líka,“ segir Gunnar og nú þarf Aníta að sækja meira í keppnisreynslu erlendis enda samkeppnin ekki mikil hér heima.

„Þessar bestu í heiminum eru velflestar með mjög mikla reynslu. Sú sem er efst á heimslistanum núna er sem dæmi komin yfir þrítugt og því orðin geysilega reynd.

Aníta mætir henni einmitt í Birmingham eftir tíu daga. Hún þarf að safna í reynslubankann og við verðum að gera okkur grein fyrir því að það gengur ekki alltaf allt upp í hverju hlaupi. Þú öðlast ekki keppnisreynslu nema að keppa. Hún er því að reyna að komast meira og meira í hlaup þar sem hún lendir í toppkeppni til að geta upplifað allt sem því fylgir,“ segir Gunnar Páll.

Það mátti sjá mun á hlaupastíl Anítu um síðustu helgi og hún er búin að bæta hann talsvert frá því í fyrra.

„Hún hefur aukið styrkinn hjá sér því við jukum áherslurnar á styrktaræfingarnar í vetur. Hún er því orðin sterkari og heldur hlaupastöðunni mun betur heldur en í fyrra. Það er framför og við höfum líka verið að vinna talsvert mikið í hraðanum. Hún hefur aukið bæði hraða og styrk í vetur,“ segir Gunnar Páll og er mjög sáttur með hvernig Aníta er að koma út úr auknum styrktaræfingum og auknum hraðaæfingum.

Þrjú af þessum fimm Íslandsmetum Anítu hafa verið fjórföld (Konur, 20 til 22 ára, 18 til 19 ára og 16 til 17 ára) en tvö þau síðustu þreföld. Að auki hefur hún sett fimm fjórföld Íslandsmet í 800 metra hlaupi utanhúss. Alls eru Íslandsmet hennar í 800 metra hlaupi kvenna orðin 42 samkvæmt afrekaskrá FRÍ.

„Það er ekki hægt að ætlast til þess að hún setji met í hverju hlaupi en hún er enn þá í það mikilli framför að ég veit að hún er í formi til þess að bæta þetta met inni í vetur,“ segir Gunnar Páll að lokum.