Tekst Snæfellskonum það sem engu kvennaliði hefur tekist í átta ár?

Úrslitakeppni kvenna í körfubolta fer af stað í kvöld þegar bæði undanúrslitaeinvígin hefjast. Stelpurnar eru mun seinna á ferðinni en í fyrra sem sést á því að í ár byrja þær 8. apríl en Íslandsbikarinn fór á loft 6. apríl í fyrra. Leikir kvöldsins fara fram í Stykkishólmi og í Keflavík og hefjast klukkan 19.15.

Snæfell er deildarmeistari eins og í fyrra og mætir Grindavík sem tryggði sig inn í úrslitakeppnina í síðustu umferðinni. Keflavík og Haukar mætast síðan annað árið í röð í undanúrslitum Íslandsmótsins. Snæfell hefur unnið alla fjóra deildarleiki sína við Grindavík í vetur með nokkrum yfirburðum (23,3 stigum að meðaltali) en staðan var hins vegar jöfn 2-2 hjá Keflavík og Haukum.

Íslandsmeistarar Snæfells unnu fjóra síðustu leiki sína í úrslitakeppni fyrir ári og reyna að verða fyrsta liðið í átta ár sem nær að verja Íslandsmeistaratitilinn. Snæfellsliðið mætir líka inn í úrslitakeppnina í rétta gírnum eftir að hafa unnið fjóra síðustu leiki sína með 29,5 stigum að meðaltali. Þar á meðal var 28 stiga útisigur á Grindavíkurliðinu.

Grindavíkurkonur eru komnar í úrslitakeppnina í fyrsta sinn í fimm ár (2010) og þær hafa ekki unnið seríu í tíu ár (2005). Þjálfari liðsins, Sverrir Þór Sverrisson, er hins vegar vanur að fara með sín kvennalið alla leið í lokaúrslitin og nú er að sjá hvort Grindavík komist þangað í fyrsta sinn frá 2005.

Haukaliðið hefur sópað Keflavík tvisvar út úr undanúrslitunum á síðustu þremur tímabilum (3-0 bæði 2012 og 2014) og það má búast við því að Keflavíkurkonur mæti í hefndarhug inn í þetta einvígi. Til þess þurfa Keflavíkurkonur þó að byrja úrslitakeppnina vel en þær hafa tapað fyrsta leik í henni undanfarin þrjú ár.

Þau lið sem fyrr vinna þrjá leiki tryggja sér sæti í lokaúrslitunum. Snæfell og Haukar eiga möguleika á að komast þangað annað árið í röð og Keflavík í sextánda skiptið í sögunni en Grindavíkurkonur hafa beðið í áratug eftir því að spila um Íslandsmeistaratitilinn.