Tvískipt Íslandsmeistaralið hjá Snæfelli í vetur

Íslandsmeistaralið Snæfells æfir við mjög sérstakar aðstæður því hluti liðsins býr í Reykjavík og þær stelpur fengu að æfa með 1. deildarliði Stjörnunnar í vetur. Í stað þess að yfirgefa Snæfellsliðið og fara í lið á höfuðborgarsvæðinu fundu Snæfellingar leið til þess að þær gætu spilað áfram með „sínu“ liði.

„Við getum haft lið af því að við getum gert þetta svona. Það er best að þetta er búið að vera svona í tvö ár og Snæfell hefur orðið Íslandsmeistari bæði tímabilin. Þetta virkar greinilega en auðvitað vill maður hafa sem flesta leikmenn heima,“ segir Gunnhildur Gunnarsdóttir.

„Við vorum ekki að æfa saman oft í viku og jafnvel bara einu sinni, daginn fyrir leik,“ segir Gunnhildur en það voru strákar úr 8. og 9. bekk sem komu til bjargar.

„Þeir eiga hrós skilið fyrir að hafa leyft okkur að berja þá aðeins niður. Þeir eru líka búnir að bæta sig þvílíkt mikið síðan í haust sem er kannski ekkert skrítið. Þeir eiga hrós skilið fyrir að hafa nennt að mæta á hverja einustu æfingu til að sjá til þess að við gætum spilað fimm á fimm,“ segir Gunnhildur en strákarnir létu ekki þar við sitja heldur studdu vel við bakið á stelpunum í stúkunni þegar þær tryggðu sér titilinn.