Bandarískur ferðamaður fjárfesti fyrir tugi milljóna í íslensku fyrirtæki

Bandarískur ferðamaður sem ferðaðist hér á landi í sumar hefur fjárfest fyrir tugi milljóna í fyrirtækinu IceWind sem hannar og hyggst framleiða vindtúrbínur. Fjármagnið er langþráð að sögn eins forsvarsmanna Icewind sem segir að nú geti þeir unnið í fullri vinnu við fyrirtækið.

Fyrirtækið er á bak við stormskýlið sem Vísir hefur fjallað um og verður sett upp fyrir framan Hörpu í næsta mánuði. Stormskýlið er þó bara lítið verkefni ætlað til þess að vekja athygli á vindtúrbínum fyrir sumarbústaði og fjarskiptamöstur og ætlunarverkið virðist sannarlega hafa tekist.

Sjá einnig: Stormskýlið slær í gegn á Karolina Fund

„Við fengum símtal frá bandaríska sendiráðinu hér á landi í nóvember og okkur var boðið með á orkuráðstefnuna PowerGen 2015 sem er stærsta orkuráðstefnan í þessum geira og var haldin í Las Vegas,“ segir Sæþór Ásgeirsson, einn forsvarsmanna Icewind. „Viku áður hafði bandarískur fjárfestir haft samband við okkur. Hann var að ferðast hér á landi í sumar og sá græjurnar okkar. Við hittum hann svo í Las Vegas og skrifuðum undir samning við hann.“

Allt stopp án bandaríska ferðamannsins

Sæþór segir að fjárfestirinn vilji ekki láta nafns síns getið en að samningurinn sé virði tugi milljóna íslenskra króna. Fjármagnið tryggir rekstur fyrirtækisins og nú geta Sæþór og samstarfsmaður hans, Þór Bachmann, starfað við fyrirtæki sitt í fullu starfi en auk þeirra hafa Ágúst Guðbjörnsson og Gunnar Eiríksson komið að ýmsum verkefnum. Sæþór segir að þetta fjármagn breyti öllu fyrir Icewind.

„Við höfum beðið eftir þessu lengi. Án þessa fjármagns værum við bara stopp, það er ekki hægt að reka þetta endalaust á loftinu. Síðan við stofnuðum fyrirtækið 2012 höfum við verið í sambandi við ýmsa aðila um fjárfestingu en það hefur gengið hægt. Svo kemur þessi maður bara inn og klára þetta á þremur vikum.“

Ráðstefnan var haldin í desember og í kjölfarið kom teymi frá sjónvarpstöðinni CBS til þess að fjalla um vindtúrbínur Icewind og segir Sæþór að hjólin séu heldur betur farin að snúast hjá fyrirtækinu eftir ráðstefnuna og umfjöllun CBS sem sjá má hér fyrir neðan.

 

„Það hefur verið allt á hvolfi síðan þá og pósthólfið okkar er fullt af fyrirspurnum frá fjárfestum, endursöluaðilum og kúnnum. Það breyttist bara allt á þessum eina mánuði,“ segir Sæþór.

Strákarnir stefna á erlendan markað á næsta ári en í augnablikinu vinna þeir hörðum höndum að stormskýlinu sem Vísir hefur fjallað um. Stormskýlið er nútímalegt strætóskýli þar sem tvær vindtúrbínur á þaki þess sjá skýlinu fyrir rafmagni, lýsingu, þráðlausu neti og aðstöðu til að hlaða síma og spjaldtölvur eða öllu sem hinn nútíma Íslendingur þarf á að halda.

Stefnt er að því að það verði tekið í gagnið þann 1. febrúar næstkomandi.