Miðasölu EM lýkur klukkan 11.00 | Kvótinn ekki fullur

Miðasölunni fyrir stuðningsmenn á leiki sinna liða á Evrópumótinu í Frakklandi í sumar lýkur klukkan 11.00 í dag.

Ísland keppir á EM í fyrsta skipti og stuðningsmenn íslenska liðsins, hvort sem er fólk sem er búsett hér á landi eða Íslendingar sem búa í öðrum löndum, hafa rétt á ákveðnum fjölda miða.

Samkvæmt upplýsingum frá KSÍ sem bárust Vísi nú í morgun hafa Íslendingar sótt um 20 þúsund miða alls, mögulegum leikjum Íslands í útsláttarkeppninni meðtöldum.

Sjá einnig: Auktu líkurnar á að fá miða á EM [ksi.is]

Fæstir miðar eru í boði fyrir stuðningsmenn Íslands á leikinn gegn Portúgal í St. Etienne. Sótt hefur verið um tæplega sex þúsund miða á leikinn en Ísland á rétt á um sjö þúsund miðum.

Uppfært: KSÍ bendir á að UEFA áskilur sér rétt á að taka frá miða vegna öryggisráðstafanna og af öðrum ástæðum. Það eru ekki til endanlegar tölur um hversu marga miða Ísland á rétt á en áætla að það séu tæplega sjö þúsund miðar á leikinn gegn Portúgal.

Miðar eru í mismunandi verðflokkum og er mesta eftirspurnin eftir miðum í verðflokki 4. Ef miðar seljast upp í þann verðflokk gæti umsóknum um slíka miða verið hafnað, þrátt fyrir að lausir miðar séu í öðrum verðflokkum. KSÍ mælir því með því að sækja um miða í fleiri verðflokkum með þeim fyrirvara að viðkomandi gæti þá endað með að kaupa dýrari miða en upphaflega var ætlað.

Alls hafa 4500 manns sótt um miða á síðu Íslands fyrir EM í gegnum heimasíðu UEFA, þar af rúmlega 1600 manns núna um helgina. Það skal þó tekið fram að þetta eru ekki endanlegar tölur um fjölda stuðningsmanna Íslands á EM.

Sjá einnig: Ísland vær 34 þúsund miða á EM

„Óseldir“ miðar af íslensku úthlutuninni verða boðnir stuðningsmönnum hins liðsins í hverju tilfelli fyrir sig.

Allar upplýsingar um miðasöluna má finna á vef UEFA sem og KSÍ.

Þess má geta að það stefnir í allir sem sækja um miða á leiki Íslands verði að ósk sinni. Allar umsóknir um miða sem eru samþykktar eru skuldbindandi.

Leikir Íslands:

Þriðjudagur 14. júní kl. 19.00: Portúgal - Ísland

Leikvöllur: Stade Geoffroy-Guichard, Saint-Etienne

Tekur: 42.000 áhorfendur

Ísland fær: 7 þúsund miða

Staða í morgun: Sótt um tæplega 6.000 miða

Laugardagur 18. júní kl. 16.00: Ísland - Ungverjaland

Leikvöllur: Stade Vélodrome, Marseille

Tekur: 67.394 áhorfendur

Ísland fær: 12 þúsund miða

Staða í morgun: Sótt um rúmlega 6.000 miða

Miðvikudagur 22. júní kl. 16.00: Ísland - Austurríki

Leikvöllur: Stade de France, Saint-Denis

Tekur: 81.338 áhorfendur

Ísland fær: 15 þúsund miða

Staða í morgun: Sótt um tæplega 5.500 miða