Hólmbert má ræða við Norrköping

Hólmbert Aron Friðjónsson er á leið til Norrköping nú um helgina þar sem hann mun ræða við forráðamenn félagsins.

Þetta staðfesti Jónas Kristinsson, framkvæmdastjóri KR, í samtali við vefsíðuna 433.is en engar formlegar viðræður hafa þó farið fram á milli félaganna um möguleg kaup á kappanum.

Hólmbert Aron gekk í raðir KR um mitt síðastliðið tímabil eftir að hafa verið hjá skoska liðinu Celtic og sem lánsmaður hjá Bröndby í Danmörku. Hann skoraði fimm mörk í tólf leikjum með KR í sumar.

Arnór Ingvi Traustason leikur með Norrköping sem samdi við annan íslenskan leikmann, Jón Guðna Fjóluson, í haust.

„Hann er bara að fara að hitta menn og tala við þá. Þetta snýst svolítið um það sem hann vill gera en það er ekkert tilboð komið,“ sagði Jónas við 433.is.