Segja Steinþór fara ítrekað fram „með dylgjur og óbeinar ásakanir“

Stjórn Borgunar segir Steinþór Pálsson, bankastjóra Landsbankans, fara ítrekað fram með dylgjur og óbeinar ásakanir um óheiðarleika og illan ásetning. Það beinist gegn stjórnendum Borgunar og standist enga nánari skoðun. Í tilkynningu frá stjórninni segir að Steinþór sé orðinn margsaga um hvort og hvernig Landsbankinn hafi kynnt sér mögulega valrétt Visa Inc.

Borgun á von á 4,8 milljörðum króna vegna sölu Visa Europe. Landsbankinn seldi rúmlega þrjátíu prósenta hlut í fyrirtækinu fyrir 2,2 milljarða til stjórnenda og hóps fjárfesta árið 2014 en salan hefur sætt talsverðri gagnrýni að undanförnu. Hluturinn var ekki boðinn út og því ekki á allra færi að bjóða í hann.

Sjá einnig: Borgun á von á fimm milljörðum í peningum vegna sölunnar á Visa Europe

Steinþór sagði í Kastljósi í kvöld að Landsbankinn væri að skoða hvort að fara ætti með málið til sérstaks saksóknara.

Stjórn Borgunar gerir alvarlegar athugasemdir við framgöngu bankastjórans.

Í fyrsta lagi sé allt tal um blekkingar fráleitt. Þar sem stjórnendur og starfsmenn Borgunar hafi keypt 6,24 prósenta hlut í félaginu af Landsbankanum og þeir hafi selt rúman helming þess hluta tveimur mánuðum áður en tilkynnt hafi verið um sölu Visa Europe og hagnað Borgunar. Það hafi verið gert án nokkurs fyrirvara um sölu Visa.

Þá segir í tilkynningunni að Landsbankinn hafi haft mun betri aðgang að upplýsingum um valréttinn umrædda en Borgun. Einhvers vegna hafi bankinn gert fyrirvara í viðskiptum með eign sína í Valitor en ekki í valrétt Visa Inc.

„Það er ótrúlegt að Landsbankinn, eftir að hafa að eigin sögn kynnt sér gögn um valréttinn vel, hafi samt komist að þeirri niðurstöðu að Borgun, einn allra leyfishafa, hefði ekki rétt til greiðslna, kæmi til sölu Visa Europe.“

Stjórnin segir að við sölu á hluti Landsbankans hafi fulltrúar hans haft aðgang að öllum upplýsingum sem málið skipti.

„Alvarlegar ásakanir bankastjórans um meint lögbrot annarra í þessu máli má sjálfsagt skoða í ljósi þeirrar erfiðu stöðu sem Landsbankinn er kominn í. Stjórnendur Borgunar frábiðja sér með öllu að vera gerðir að blórabögglum í þessu máli“

Yfirlýsingu Borgunar í heild sinni má sjá hér að neðan.

Stjórn Borgunar gerir alvarlegar athugasemdir við framgöngu Steinþórs Pálssonar bankastjóra Landsbankans í fjölmiðlum. Steinþór fer ítrekað fram með dylgjur og óbeinar ásakanir um óheiðarleika og illan ásetning stjórnenda Borgunar sem standast enga nánari skoðun. Þetta eru staðreyndir málsins:

1. Stjórnendur og aðrir starfsmenn Borgunar keyptu 6,24% hlut í félaginu af Landsbankanum. Tveimur mánuðum áður en tilkynnt var um sölu Visa Europe og hagnað Borgunar, seldu þessir sömu stjórnendur og starfsmenn Borgunar rúman helming af þeim hlut, án nokkurs fyrirvara um sölu Visa Europe. Allt tal um blekkingar verður algerlega fráleitt í þessu ljósi.

2. Steinþór Pálsson er orðinn margsaga um hvort og hvernig Landsbankinn kynnti sér mögulegan valrétt Visa Inc. Eins hvers vegna bankinn gerði fyrirvara í viðskiptum með eign sína í Valitor en ekki í Borgun. Staðreyndin er sú að Landsbankinn hafði mun betri aðgang að upplýsingum um þennan valrétt en Borgun. Það er ótrúlegt að Landsbankinn, eftir að hafa að eigin sögn kynnt sér gögn um valréttinn vel, hafi samt komist að þeirri niðurstöðu að Borgun, einn allra leyfishafa, hefði ekki rétt til greiðslna, kæmi til sölu Visa Europe.

3. Við sölu á hlut Landsbankans í Borgun árið 2014 höfðu fulltrúar Landsbankans aðgang að öllum upplýsingum sem máli skiptu, (þar með talið samningum við VISA),að undanskildum upplýsingum um samkeppnisaðila sína. Landsbankanum var í lófa lagt að fá ytri sérfræðinga til þess að yfirfara hverjar þær upplýsingar sem hann vildi um málefni Borgunar, hefði hann kosið að gera slíkt.

4. Alvarlegar ásakanir bankastjórans um meint lögbrot annarra í þessu máli má sjálfsagt skoða í ljósi þeirrar erfiðu stöðu sem Landsbankinn er kominn í. Stjórnendur Borgunar frábiðja sér með öllu að vera gerðir að blórabögglum í þessu máli.