Inter heldur enn í vonina um Meistaradeildarsæti

Palermo sótti ekki gull í greipar Inter þegar liðin mættust í lokaleik 28. umferðar ítölsku úrvalsdeildarinnar í kvöld.

Inter fór með sigur af hólmi, 3-1, en þetta er aðeins fjórði deildarleikurinn á tímabilinu sem lærisveinar Robertos Mancini vinna með meira en einu marki.

Adem Ljajic kom Inter yfir á 11. mínútu og tólf mínútum seinna bætti fyrirliðinn Mauro Icardi við öðru marki.

Franco Vázquez minnkaði muninn í 2-1 fyrir Palermo á lokamínútu fyrri hálfleik en Ivan Perisic kom Inter aftur í þægilega stöðu þegar hann skoraði þriðja mark liðsins á 54. mínútu.

Fleiri urðu mörkin ekki og Inter fagnaði 3-1 sigri. Liðið er í 5. sæti deildarinnar með 51 stig, fimm stigum frá Meistaradeildarsæti.