Barcelona henti frá sér tveggja marka forystu

Barcelona glutraði niður tveggja marka forskoti gegn Villareal í dag í spænsku úrvalsdeildinni í knattspyrnu, en lokatölur urðu 2-2.

Fyrir leikinn var Barcelona búið að vinna síðustu níu leiki í öllum keppnum, en Villareal náði að stöðva sigurgönguna í dag.

Ivan Rakitic kom Barcelona yfir á 21. mínútu og Neymar tvöfaldaði forystuna af vítapunktinum tuttugu mínútum síðar og staðan 2-0 í hálfleik.

Flestir héldu að eftirleikurinn yrði auðveldur en svo var ekki. Cedric Bakambu minnkaði muninn á 58. mínútu fyrir Villareal og fimm mínútum síðar jöfnuðu heimamenn.

Jeremy Mathieu setti þá boltann í eigið mark, en hvorugu liðinu tókst að skora sigurmarkið og lokatölur 2-2. Mikil harka var í leiknum, en ellefu gul spjöld fóru á loft.

Barcelona er enn á toppnum með 76 stig, með níu stiga forskot á Atletico Madrid sem er í öðru sæti, en Villareal er í fjórða sætinu með 54 stig.