„Af hverju sagðirðu ekki bara hlutina eins og þeir eru og af hverju sagðirðu ekki satt?“

Öll spjót beindust að Sigmundi Davíð Gunnlaugssyni í óundirbúnum fyrirspurnatíma á þingfundi í dag. Þingmenn stjórnarandstöðunnar kröfðu hann meðal annars um hvort hann hefði hug á að segja af sér embætti, hví hann hefði ekki sagt satt í sjónvarpsviðtali sem sýnt var um heim allan í dag og hvernig hann ætlaði sér að lagfæra þá álitshnekki sem Ísland hefði orðið fyrir á alþjóðavettvangi vegna málsins. 

Árni Páll Árnason, formaður Samfylkingarinnar reið á vaðið og spurði hvort hann ætlaði að biðjast afsökuanr á því að hafa sett þjóðina í þá stöðu að forsætisráðherra landsins væri stillt upp með nokkrum af illræmdustu einræðisherrum heimsins. „Ætlar hann að horfast í augu við veruleikann og segja af sér embætti?“ 

Spurningunni svaraði Sigmundur Davíð ekki en henni hafði hann svarað í hádegisfréttum Stöðvar 2. Þar kom fram að hann hefði ekki einu sinni íhugað að segja af sér. „Erlendum fjölmiðlum má geta til hróss að þeir taka fram að ekkert bendir til þess að í þessu máli hafi verið rangt haft við eða stungið undan skatti.“ sagði Sigmundur Davíð. Hann bætti því við að skattaskjól væru ekki skilgreind eftir hvaða landi þau væru í heldur hvort menn greiði alla skatta sem mönnum er ætlað. 

Óðagot kom á hann

Katrín Jakobsdóttir las upp úr viðtali við forsætisráðherra og vitnaði til svara hans. „Af hverju sagðirðu ekki strax að konan þín ætti Wintris? Af hverju sagðirðu ekki bara hlutina eins og þeir eru og af hverju sagðirðu ekki satt?“

„Ég ætla hvorki að halda því fram að frammistaða mín hafi verið til eftirbreytni eða fara að rekja hér, til að setja hlutina í samhengi, hvernig þetta bar að,“ sagði Sigmundur Davíð í svari sínu. Hann bætti því við að svör sín hefðu byggst á undrun sinni yfir því hvaða stefnu viðtalið hefði tekið og „óðagoti“ sem hefði komið á hann. „Staðreyndin er sú að það hefur alltaf legið fyrir að konan mín á þetta félag og það hafa alltaf verið greiddir af því skattar.“

Mikilvægt að allir veiti réttar upplýsingar

„Hvernig ætlar ráðherra að beita sér fyri því að erlendir aðilar skilji betur hvernig þetta mál sé eðlilegt en ekki hneykslanlegt?“ spurði píratinn Helgi Hrafn Gunnarsson. 

Svar forsætisráðherra var á þá leið að mikilvægast væri að bregðast við og veita réttar upplýsingar. „Það er mikilvægt að réttar og sannar upplýsingar breist frá öllum, bæði frá þeim sem málið varðar beint og öðrum, að þeir svari af hreinskilni hvað sé rétt og hvað ekki.“ Að því loknu endurtók hann hrós til erlendra fjölmiðla sem áður hefur verið nefnt.

Helgi Hrafn sætti sig ekki við þetta svar. „Telur hæstvirtur ráðherra að með því að veita þau svör sem hann hefur veitt þá takist það að bjarga Íslandi frá þeim hnekki sem það hefur beðið? Trúir hann því í alvörunni? Heldur hann að viðhorfið í Bretlandi og Þýskalandi breytist og þar þyki það í lagi að ráðherrar og fjölskylda hans geymi eignir á Tortóla?“ 

„Til að svara spurningunni um hvað mönnum finnst um þetta í útlöndum þá þykir það gott ef menn hafa alltaf staðið við sitt, greitt sína skatta og ekki nýtt möguleika sem kynnu að skapast til annars,“ sagði Sigmundur.

Að fyrirspurnatíma loknum lét Sigmundur sig hverfa með hraði úr þinghúsinu.