Engin Hildur með í fyrsta sinn í 22 ár

Haukar og Snæfell mætast í kvöld í hreinum úrslitaleik um Íslandsmeistaratitil kvenna í körfubolta en leikurinn fer fram í Schenkerhöllinni á Ásvöllum og hefst hann klukkan 19.15.

Bæði liðin hafa unnið heimaleiki sína í úrslitaeinvíginu til þessa og Haukakonur búa að því, sem deildarmeistarar, að vera á heimavelli í leiknum í kvöld sem verður sýndur beint á Stöð 2 Sport 2.

Þetta verður sjötti hreini úrslitaleikurinn í sögu úrslitakeppni kvenna og sá fyrsti síðan að KR og Hamar spiluðu oddaleik um titilinn vorið 2010.

Hildur Sigurðardóttir, fyrrum fyrirliði Snæfells, lagði skóna á hilluna síðasta vor og er því ekki með Snæfellsliðinu að þessu sinni.

Hildur spilaði fjóra síðustu oddaleiki um titilinn en hún var með KR í þessari stöðu 2000, 2002, 2009 og 2010. Engin kona hefur spilað jafnmarga oddaleiki um Íslandsmeistaratitilinn.

Hildur var í sigurliði í leikjunum 2002 og 2010 en þurfti að sætta sig við tap 2000 og 2009.

Hildur skoraði samtals 47 stig í þessum fjórum oddaleikjum og bætti þá met Guðbjargar Norðfjörð sem skoraði 45 stig í fyrstu þremur úrslitaleikjunum um Íslandsmeistaratitilinn.

Guðbjörg Norðfjörð er ein af þremur sem hafa náð að spila þrjá oddaleiki um titilinn en hinar eru Kristín Björk Jónsdóttir og Guðrún Arna Sigurðardóttir.

Aðeins einn leikmaður úr báðum liðum hefur spilað í oddaleik um Íslandsmeistaratitilinn en tveir aðrir leikmenn hafa verið í hóp í úrslitaleik um titilinn.

Alda Leif Jónsdóttir í liði Snæfells spilaði á sínum tíma tvo úrslitaleiki um titilinn, fyrst með Keflavík á móti KR 2000 og svo með ÍS á móti KR tveimur árum síðar.

Haukakonurnar Jóhanna Björk Sveinsdóttir (KR 2010) og María Lind Sigurðardóttir (Haukar 2009) voru báðar í hóp hjá sínum liðum í þessum leikjum en fengu ekki að fara inná völlinn.

Oddaleikir um Íslandsmeistaratitilinn:

1994: Keflavík 68-58 KR

2000: KR 43-58 Keflavík

2002: ÍS 64-68 KR

2009: Haukar 69-64 KR

2010: KR 84-79 Hamar

Flest stig í oddaleik um Íslandsmeistaratitilinn:

1. Hildur Sigurðardóttir    47

2. Guðbjörg Norðfjörð    45

3. Kristrún Sigurjónsdóttir    35

4. Helga Þorvaldsdóttir    31

5. Anna María Sveinsdóttir    30

6. Slavica Dimovska    27

7. Unnur Tara Jónsdóttir    27

8. Margrét Kara Sturludóttir    26

9. Olga Færseth    26

10. Alda Leif Jónsdóttir    25