Eygló: Leið vel í öllum sundum nema úrslitasundunum

Eygló Ósk Gústafsdóttir var „þokkalega“ ánægð með niðurstöðu dagsins á EM í sundi en hún hafnaði í sjötta sæti í 100 m baksundi. Eygló var í fjórða sæti eftir fyrri 50 metrana en gaf svo eftir á síðari sprettinum.

„Ég vildi meira eins og alltaf,“ sagði Eygló Ósk við Vísi í kvöld. „Ég átti ágætt sund en staðreyndin er að mér leið vel í öllum sundum í mótinu nema úrslitasundinu. Það er þar sem ég er að klikka.“

Eygló Ósk vill helst ekki kenna stressi um og bætir við að þó svo að hún hafi hvílt nokkuð fyrir mótið sé hún ekki í algjöru toppformi.

„Mér fannst þetta því ágætt miðað við aðstæður og ég tel að það sé alveg klárt að ég á heilmikið inni.“

„Mér fannst ganga mjög vel í gær en það er samt heilmikið sem ég get bætt þar. Þetta kemur vonandi allt saman.“