Hvalkjöt verður framvegis ekki selt í verslunum Samkaupa á Húsavík. Þetta er meðal þess sem felst í nýju samkomulagi milli hvalaskoðunarfyrirtækisins Norðursiglingar og Samkaupa, sem reka verslanirnar Nettó og Krambúðina á Húsavík.
Samkomulag fyrirtækjanna miðar að því að markaðssetja Húsavík sem hvalamiðstöð á Íslandi. Það felur einnig í sér að kynningarefni Norðursiglingar verður gert aðgengilegt í verslunum Samkaupa á Húsavík.
Hvalaskoðun er mjög vinsæl meðal ferðamanna á Húsavík en hvalveiðar Íslendinga eru, sem kunnugt er, verulega umdeildar víða um heim.
Haft er eftir Gústafi Gústafssyni, markaðs- og kynningarstjóra Norðursiglingar, í tilkynningu að hvalveiðar og sala á hvalaafurðum séu á algerri andstöðu við stefnu fyrirtækisins.
„Það er því táknrænt að einmitt hér á Húsavík sé hvalkjöt tekið úr sölu í verslunum,“ segir Gústaf í tilkynningunni.
Af tilkynningunni verður þó ekki ráðið að til standi að taka hvalkjöt úr verslunum Samkaupa annarsstaðar á landinu.
Taka hvalkjöt úr verslunum sínum á Húsavík
Tengdar fréttir
Engar hvalveiðar í sumar: „Ef við hefðum vitað hvað var í vændum í Japan hefðum við aldrei byrjað aftur“
Hvalur hf. hyggst ekki veiða neina hvali næsta sumar þar sem fyrirtækinu hefur gengið illa að koma hvalaafurðum á markað í Japan.
Tugþúsunda fjölgun í hvalaskoðun árlega
Farþegar tólf hvalaskoðunarfyrirtækja í fyrra voru 272 þúsund alls. Fjölgunin á milli ára síðan 2012 er frá 15 til 35 prósenta.
