Aurum-holding ekki verðmetið að nýju

Félagið Aurum-Holding verður ekki verðmetið aftur vegna Aurum-málsins svokallaða. Þrír af fjórum ákærðu höfðu farið fram á það, en beiðni þeirra var hafnað í Héraðsdómi Reykjavíkur. Hæstiréttur hefur nú staðfest þann úrskurð.

Í Aurum-málinu eru þeir Lárus Welding, Jón Ásgeir Jóhannesson, Magnús Arnar Arngrímsson og Bjarni Jóhannesson ákærðir fyrir umboðssvik og hlutdeild í þeim. Ákæran snýst um sex milljarða króna lán sem Glitnir veitti félaginu FS38 ehf. sem var í eigu Pálma Haraldssonar, vegna kaupa á félaginu Aurum Holdings Ltd, í júlí 2008. Þeir neita allir sök.

Ákæra í Aurum-málinu var gefin út þann 12. desember 2012 og voru sakborningar sýknaðir af ákærunni í héraði í júní 2014. Tæpu ári síðar ógilti Hæstiréttur þann dóm þar sem hann féllst á þann málatilbúnað ákæruvaldsins að sérfróður meðdómari í málinu í héraði, Sverrir Ólafsson, hafi verið vanhæfur til að dæma í því vegna ættartengsla sinna við Ólaf Ólafsson sem var dæmdur í fangelsi fyrir aðild sína að Al Thani-málinu.

Krafan um endurmatið var upprunalega lögð fram í kjölfar þess að Hæstiréttur féllst á kröfu Ólafs Þórs Haukssonar, héraðssaksóknara, um að leiða fyrir dóm vitni sem lagt höfðu mat á verðmæti félagsins í einkamáli.

Þeir Lárus, Jón Ásgeir og Magnús Arnar fóru fram á að fá dómkvadda matsmenn að málinu.

Hæstiréttur taldi að raunverulegur tilgangur beiðninnar væri að sýna fram á að ákveðið skilyrði almennra hegningarlaga væri ekki uppfyllt. Það er að hinir ákærðu hefðu valdið Arion banka verulegri fjártjónshættur. Þá taldi dómurinn að umbeðið mat væri tilgangslaust til sönnunar. Því var niðurstaða Héraðsdóms Reykjavíkur staðfest.