Green fær ekki leikbann fyrir pungsparkið | Myndband

Draymond Green, miðherji NBA-meistara Golden State Warriors, sleppur við leikbann þrátt fyrir að sparka í punginn á Steven Adams, miðherji Oklahoma City Thunder, í þriðja leik liðanna í lokaúrslitum vesturdeildarinnar.

Green lét vaða í fermingabróðurinn og kúlurnar á Adam í þriðja leik liðanna sem Oklahoma City vann örugglega og bjuggust margir við því að hann færi í bann og yrði ekki með í fjórða leiknum í nótt.

Dómararnir dæmdu ásetningsvillu af fyrstu gráðu en NBA-deildin ákvað að hækka hana upp í aðra gráðu og sekta Green um 25.000 dali. Aftur á móti sleppur hann við leikbann sem fyrr segir.

Green hefur nú fengið dæmdar á sig þrjár ásetningsvillur í úrslitakeppninni og fái hann eina í viðbót fer hann sjálfkrafa í bann. Hann og Bismack Biyombo, leikmaður Toronto Raptors, hafa báðir fengið þrjár slíkar villur í úrslitakeppninni.

Þetta eru góð tíðindi fyrir Golden State sem er í erfiðri stöðu í einvíginu gegn Oklahoma City. Liðið er nokkuð óvænt 2-1 undir eftir þrjá leiki en liðin mætast í fjórða leiknum í nótt klukkan eitt eftir miðnætti.

Atvikið má sjá hér að neðan en þar ræða blaðamennirnir Michael Wilbon og Marc Stein um atvikið fyrir ESPN.