Gunnar heldur áfram að klífa lista UFC

UFC bardagasambandið gaf í kvöld út nýjan styrkleikalista.

Gunnar Nelson heldur áfram að fara upp listann og aftur fer hann upp um eitt sæti. Úr tólfta sæti í það ellefta.

Það er jöfnun á hans besta árangri á listanum. Næst á dagskrá hjá Gunnari er því að komast inn á topp tíu listann.

Rick Story, sem var fyrstur allra til þess að vinna Gunnar, er í sætinu fyrir ofan Gunnar. Hann vann Belgann Tarec Saffiedine á sunnudag en Saffiedine fellur niður í þrettánda sætið eftir tapið.

Lítil breyting er á pund fyrir pund listanum. Jon Jones enn í efsta sæti. Robbie Lawler hoppar upp um eitt sæti en Rafael dos Anjos fer að sama skapi niður um eitt.

Gunnar lagði Rússann Albert Tumenov fyrr í mánuðinum og nú bíða menn frétta af næsta bardaga hans.