Einkunnir Íslands: Birkir Már bestur í jöfnu liði Íslands

Eiríkur Stefán Ásgeirsson skrifar 6. júní 2016 21:16

Birkir Már átti flottan leik í bláa búningnum í kvöld og skoraði sitt fyrsta landsliðsmark, og þvílíkt mark! Vísir/Eyþór

Strákarnir okkar fóru létt með Liechtenstein í Laugardalnum í kvöld og lönduðu 4-0 sigri í síðasta leik sínum fyrir EM. Hér að neðan má sjá einkunnir leikmanna Íslands í kvöld að mati íþróttadeildar 365 miðla.

Hannes Þór Halldórsson - 7

Reyndi nokkrum sinnum á hann og Hannes var öryggið uppmálað í öllum sínum aðgerðum.

Birkir Már Sævarsson - 7

Skoraði glæsilegt mark og átti skínandi góðan leik. Mikil yfirvegun í því sem hann gerði.

Ragnar Sigurðsson - 6

Komst vel frá sínu og fór svo af velli snemma í síðari hálfleik.

Sverrir Ingi Ingason - 6

Komst nálægt því að skora en skallaði yfir úr góðu færi eftir hornspyrnu. Átti rólegan dag í vörninni.

Ari Freyr Skúlason - 6

Skilaði fínu dagsverki eins og svo oft áður í landsliðinu. Er orðinn einn mikilvægasti leikmaður liðsins.

Jóhann Berg Guðmundsson - 6

Átti frekar rólegan fyrri hálfleik og var svo tekinn af velli.

Aron Einar Gunnarsson - 6

Fyrirliðinn fékk áfram dýrmætar mínútur og allt annað að sjá til hans en í síðasta leik. Virkar samt ekki í sínu besta leikformi.

Gylfi Þór Sigurðsson - 7

Gerði sitt vel án þess að taka of miklar áhættur, eins og allir aðrir í íslenska landsliðinu.

Arnór Ingvi Traustason - 6

Sýndi lipur tilþrif og kæmi ekki á óvart ef hann fengi mínútur á EM. Kom þó lítið úr því sem hann gerði. Fullur sjálfstrausts í landsleikjum þrátt fyrir litla reynslu.

Alfreð Finnbogason - 7

Skoraði og átti stóran þátt í fyrsta markinu þar að auki. Alfreð nýtti mínúturnar vel í dag.

Kolbeinn Sigþórsson - 7

Skoraði og spilaði í tæpar 80 mínútur. Það eru frábærar fréttir fyrir íslenska landsliðið. Gerði sitt vel í leiknum.

Varamenn

Theodór Elmar Bjarnason 6

Kom inn á fyrir Jóhann Berg á 46. mínútu. Skilaði sínu hlutverki ágætlega og átti glæsilega stoðsendingu á Eið Smára í fjórða marki Íslands.

Eiður Smári Guðjohnsen 7

Kom inn á fyrir Alfreð á 46. mínútu. Sem betur fer skoraði hann eftir að hafa verið svo nálægt því í tvígang eftir að hann kom inn á. Frábær stund fyrir hann og stuðningsmenn íslenska landsliðsins. Góð innkoma hjá honum.

Hjörtur Hermannsson 5

Kom inn á fyrir Ragnar á 54. mínútu. Fékk ekki mikið að gera í vörninni.

Emil Hallfreðsson 5

Kom inn á fyrir Arnór Ingva á 69. mínútu

Rúnar Már Sigurjónsson -

Kom inn á fyrir Kolbein Sigþórsson á 80. mínútu.

Hörður Björgvin Magnússon -

Kom inn á fyrir Ara Frey Skúlason á 87. mínútu

EM 2016 í Frakklandi