Arna Stefanía 10 sekúndubrotum frá sínu best

Arna Stefanía Guðmundsdóttir varð í 18. sæti í undanúrslitum í 400 metra grindahlaupi á Evrópumeistaramótinu í frjálsum íþróttum í Amsterdam.

Arna Stefanía hljóp í riðli tvö og fór mjög vel af stað. Hún virtist þó þreytast þegar tvær grindur voru eftir og missti fjóra keppendur fram úr sér og varð síðust í riðlinum á 57,24 sem er 10 sekúndubrotum frá besta tíma hennar sem hún náði í undanrásum.

Þessi tími hefði dugað henni í fjórða sæti í fyrsta riðli og sjötta í þriðja en hún virtist hafa farið aðeins of geyst af stað til að halda hlaupið út.

Frábær árangur engu að síður hjá Örnu Stefaníu á hennar fyrsta stórmóti og dýrmæt reynsla fyrir framhaldið.