Fyrir sex árum spilaði Steven Lennon með liðinu sem FH mætir í Evrópukeppninni á morgun

Steven Lennon, skoski framherji FH-liðsins, var tekinn í viðtal á heimasíðu FH fyrir leik Íslandsmeistaranna á móti Dundalk í forkeppni Meistaradeildar Evrópu. Leikurinn fer fram í Írlandi á á morgun, miðvikudag.

Steven Lennon hefur spilað með FH undanfarin þrjú tímabil og þar áður með Fram frá 2011 til 2013. Fyrir sex árum var hann hinsvegar að reyna fyrir sér í Írlandi.

„Ég spilaði þarna árið 2010, en það var bara í nokkra mánuði eftir að ég fór frá Glasgow Rangers. Því miður meiddist ég eftir nokkra leiki,” sagði Lennon um dvölina sína hjá írska félaginu. Hann fótbrotnaði og yfirgaf félagið eftir tímabilið.

„Liðið er mjög breytt frá því ég var þarna og það er ekki einn leikmaður eftir. Eftir að ég fór voru fjárhagsvandræði og árin 2011 og 2012 var félagið ekki langt frá því að verða gjaldþrota," sagði Steven Lennon sem náði ekki að skora í 10 leikjum með liðinu í írsku deildinni.

„Með peningum frá stuðningsmönnum og fjárhagssterkum mönnum í hverfinu komust þeir á lappir aftur og hafa þeir nú unnið deildina nokkur ár í röð og eru með sterkt lið. Styrkleikar þeirra liggja í góðum vængmönnum og miðjumönnum," sagði Lennon.

Hvernig metur Skotinn möguleika FH á að fara áfram?

„Ég held að þetta verði mjög jöfn viðureign, svipað og gegn SJK Seinäjoen í fyrra. Ef FH spilar á þeirra styrkleikum og fer eftir leikskipulagi þjálfaranna fyrir útileikinn er ég viss um að við verðum með sjálfstraust fyrir leikinn í Kaplakrika og klárum þá þar,” sagði Lennon við FH.is en það má sjá allt viðtalið hér.

FH vann báða leikina á móti SJK í fyrra þar á meðal tryggði Steven Lennon 1-0 sigur í fyrri leiknum sem fór fram í Finnlandi.