Sagði stuðningsmenn Sanders haga sér fáránlega

Grínistinn Sarah Silverman sagði hörðustu stuðningsmenn Bernie Sanders haga sér fáránlega á flokksþingi demókrata í Philadelphia í gær.

Silverman, sem studdi Sanders í forvalinu, lýsti því yfir í ræðu sinni á þinginu að hún myndi stolt kjósa Hillary Clinton til forseta. Við það var púað á hana.

Hörðustu stuðningsmenn Bernie Sanders hafa verið duglegir við að púa á ræðumenn þegar nafn Hillary Clinton hefur verið nefnt.

Atvikið sem um ræðir hefst eftir rúmar sex mínútur.

Stuðningsmenn Sanders púuðu meira að segja á hann, þegar hann hvatti fólk til að kjósa Hillary Clinton.

Flokksþingum repúblikana og demókrata er ætlað að þjappa stuðningsmönnum flokkana saman fyrir forsetakosningarnar í nóvember.

Á þingi Repúblikana neitaði Ted Cruz að styðja Donald Trump og virðast demókratar ekki vera í betri stöðu sé horft til samheldni.