Fyrrum leikmaður Real Madrid og Barcelona tekur við spænska landsliðinu

Spænska knattspyrnusambandið er búið að finna eftirmann Vicentes del Bosque.

Sá heitir Julen Lopetegui en hann verður kynntur sem næsti landsliðsþjálfari Spánar í kvöld.

Lopetegui var markvörður á sínum tíma og lék einn A-landsleik fyrir Spán. Hann lék bæði með Real Madrid og Barcelona en fékk fá tækifæri hjá þessum stórliðum.

Lopetegui var síðast við stjórnvölinn hjá Porto en hann var rekinn þaðan í byrjun árs.

Á árunum 2010-14 þjálfari Lopetegui yngri landslið Spánar og náði góðum árangri. Undir hans stjórn urðu bæði U-19 ára og U-21 árs liðin Evrópumeistarar.

Í U-21 ára liðinu sem varð Evrópumeistari 2013 voru margir leikmenn sem eru nú í spænska A-landsliðinu. Má þar nefna leikmenn á borð við David de Gea, Álvaro Morata, Thiago og Koke.

Spánn féll úr leik fyrir Ítalíu í 16-liða úrslitum á EM í Frakklandi. Eftir mótið ákvað Del Bosque svo að draga sig í hlé eftir að hafa þjálfað spænska landsliðið í átta ár.