Sonia Rykiel er látin

Franski fatahönnuðurinn Sonia Rykiel er látin, 86 ára að aldri. Hún hefur þjáðst af Parkingsons sjúkdóminum í fjölda ára. Dóttir hennar, Nathalie Rykiel, greindi frá þessu núna í morgun. 

Árið 2012 tilkynnti hún fjölmiðlum að hún hafi þjáðst af Parkinsons sjúkdómnum í 15 ár. Hún hafi reynt eftir bestu getu að halda sjúkdómnum leyndum en þegar erfitt var orðið að fela kvilla hans sagði hún fjölskyldu og vinum frá honum. 

Sonia fæddist árið 1930 í París. Fjölskylda hennar var af efri stéttinni en foreldrar hennar voru rússneskir gyðingar. Hún hóf tískuferilinn aðeins 17 ára gömul þegar hún klæddi gínur í gluggunum á vefnaðarverslun í París. Hún giftist Sam Rykiel árið 1953 en hann rak tískuverslun. 

Það var í þeirri verslun sem að hún byrjaði að selja sínar fyrstu peysur. Sonia hefur oft verið kölluð drottning prjónaflíkanna. Ein af fyrstu frægu viðskiptavinum hennar var engin önnur en leikkonan Audrey Hepburn. Hún mætti í verslunina sem eiginmaður Rykiel rak og keypti peysurnar hennar Soniu í öllum litum, eða 14 stykki. 

Sonia hélt áfram að vaxa og dafna innan tískubransans. Merkið hennar er í dag með virtari evrópsku merkjunum og er selt í öllum helstu tískuverslunum heims. Hún sagði hinsvegar af sér sem yfirhönnuður síns eigin merkis árið 1995 en þá tók dóttir hennar, Nathalie Rykiel, við ásamt því að gerast forstjóri. 

Hún hélt þeirri stöðu til ársins 2014 en þá tók Julie de Libran við sem yfirhönnuður. Nathalie starfar þó enn sem ráðgjafi hjá fyrirtækinu. 

Andlát Soniu er mikill missir fyrir tískubransann en hún á heiðurinn af mörgum trendum sem eru talin klassísk og tímalaus í dag. 

Ásamt því að vera drottning prjónanna og hafa verið vinsæl fyrir fallegu peysurnar sínar þá kom hún einnig röndunum á kortið. Línurnar hennar voru ávallt litríkar með sterkum litum.