Tekjur af turni Hallgrímskirkju fara yfir 200 milljónir

Áætlað er að heimsóknum gesta í Hallgrímskirkjuturn muni fjölga um þrjátíu prósent frá því í fyrra. Þetta segir Jónanna Björnsdóttir, framkvæmdastjóri Hallgrímskirkju, í samtali við Fréttablaðið. Um 200 þúsund gestir kirkjunnar keyptu sér far upp í turninn á síðasta ári sem gaf Hallgrímskirkju tekjur sem námu um 161 milljón króna. Flestir af þeim eru ferðamenn. Haldist hlutfallsleg fjölgun gesta út þetta ár má ætla að turngestir verði yfir 260 þúsund í árslok. Þetta þýðir að tekjur kirkjunnar fara yfir 200 milljónir. Aðgangseyrir að turninum er nú 900 krónur fyrir fullorðna, en 100 krónur fyrir börn 6-16 ára.

Jónanna segir að nákvæmar heimsóknartölur fyrir kirkjuna alla séu ekki alveg á hreinu. Í ársbyrjun var nýtt talningartæki tekið í notkun sem enn sé verið að fá reynslu á. Samkvæmt talningum þess hefur daglegur meðalfjöldi gesta í ár verið um 2.500 manns. Jónanna segir hins vegar að reynslan sýni að um fjórðungur gesta kaupi aðgang að turninum. Sé tekið mið af tölum um tekjur af turnheimsóknum í ársreikningum Hallgrímskirkju 2010-2015, sem sjá má í töflunni hér til hliðar, kemur í ljós að heildarfjöldi kirkjugesta muni fara yfir eina milljón á þessu ári. Tekið skal fram að tekjur sem birtast vegna þessa árs eru uppreiknaðar miðað við 30 prósent fjölgun heimsókna frá 2015.

Allar tekjur af turnferðunum renna til Hallgrímskirkju, en starfsmenn kirkjunnar sjá um að taka á móti gestum og rukka inn. „Þessi sala gerir það að verkum að við getum haft kirkjuna opna yfir allt árið,“ segir Jónanna en opnunartími kirkjunnar er frá kl. 9-21 frá maí til september, en frá kl. 9-17 yfir vetrarmánuðina. „Það að vera með starfsfólk hér á öllum þessum tímum og þurfa að sinna öllu viðhaldi er kostnaðarsamt. Þetta hús er gríðarlega stórt og þarfnast gríðarlega mikil viðhalds,“ segir hún og bendir á að nú sé unnið að steypuviðgerðum utanhúss upp á 60 milljónir. Þá hvíli á kirkjunni 400 milljóna króna bankalán sem tekið var vegna umfangsmikilla viðhaldsframkvæmda á kirkjuturninum 2008-2009. Einnig er á döfinni að endurnýja turnlyftuna og kaupa nýjan tæknibúnað sem knýr kirkjuklukkurnar. „Engar þessara viðhaldsframkvæmda væru mögulegar ef ekki kæmu til tekjur af útsýnispalli í turninum,“ segir Jónanna.

Hún segir almenna ánægju vera meðal þeirra gesta sem sækja kirkjuna. „Þeir eru mjög ánægðir með heimsóknir í kirkjuna og upp í turninn. Samkvæmt óformlegri könnun sem við gerðum í febrúar og mars kom í ljós að hún stenst þær væntingar sem gestir gera til hennar.“

Fréttin birtist fyrst í Fréttablaðinu.