CM Punk er enginn aumingi

Conor McGregor hefur ekki talað fallega um bandaríska fjölbragðaglímumenn en hann segist bera virðingu fyrir CM Punk.

Conor gerði fjölbragðaglímumenn brjálaða er hann kallaði þá alla saman aumingja.

Hann ber þó virðingu fyrir Punk því hann þorði að stíga inn í búrið hjá UFC.

„Ég verð að vera sanngjarn við hann. Hann þorði að stíga inn í búrið en því þora ekki allir. Það hafa svo sannarlega ekki allir punginn í þetta,“ sagði Conor.

Viðvera Punk, sem í raun heitir Phil Brooks, í búrinu var reyndar ekki nema 134 sekúndur þar sem Mickey Gall pakkaði honum saman og Punk náði ekki höggi á Gall.

„Hann var vissulega flengdur en hann þorði. Þessir strákar í WWE er allir aumingjar. Ég var búinn að segja ykkur það áður en ekki Punk. Hann þorði í búrið og barðist. Ég ber virðingu fyrir því.“