Októberspá Siggu Kling – Fiskur: Þessi margbreytileiki þinn er náðagáfa

Elsku hjartans Fiskurinn minn. Haustinu fylgja oft blendnar tilfinningar hjá þér, þú ert alltaf að spá og spekúlera og kannski aðeins of mikið. Þú byggir skýjaborgir og rífur þær jafnharðan niður. Þú ert stuðningsaðili svo margra í kringum þig, svo dásamlega skemmtilega meðvirkur.

Það tekur að sjálfsögðu frá þér mikla orku en þú ert elskaður og dáður fyrir þetta. Mesti styrkur þinn felst í tjáningu þinni. Þú ert eitthvað svo beintengdur við almættið að þú færð skilaboð á núll einni ef þú bara spyrð. Það grunar engan hversu feiminn og óöruggur þú ert nema þig sjálfan.

Og þú ert það sem öðrum finnst um þig. Þessi margbreytileiki þinn er náðagáfa, þú skilur allt vesen hjá öðrum og botnar svo ekkert í sjálfum þér. Hvert ár sem þú lifir gefur þér meiri gæfu vegna þess að þú færð þá næmari skilning á að lífið mun verða þér gott. Hjarta þitt er úr skínandi gulli og þú elskar skilyrðislaust flest alla, en sjálfan þig ekki nóg. Ef þú heillast af einhverju hellirðu þér bókstaflega á kaf í það.

Þar af leiðandi getur hjarta þitt orðið dáldið þreytt því oft er of mikið að gera. Þú þarft að passa þig á stríðninni því það eru miklu fleiri sem taka hana nærri sér en þú veist af. Það býr í þér svo mikill bóhem og þú ert sannkölluð tilfinningavera, svo allir fordómar geta farið fyrir svo mikið fyrir brjóstið á þér.

Ef þú skoðar í kringum þig þá áttu mjög flotta og kraftmikla vini, það er svolítið spegilmyndin af þér. Þú vilt nálgast flesta á tilfinningalegu sviði og ert svo ægilega ánægður þegar þú getur hjálpað. Það er þetta sem færir þér þessa dásamlegu vináttu sem þú svo sannarlega átt. Það er mikil ástríða í kringum þig og þú elskar stundum of mikið, ef það er hægt. Þá er ég að tala um allt og alla ekki bara maka eða kærustu og þú verður svo rosalega hissa ef fólk bregst þér.

Þegar þú lendir í því getur þú sýnt of mikla taugaveiklun og þá getur þú verið of fljótfær í orðum. Það stendur á stórum vegg í Advania, setning eftir mig og ég vissi ekki einu sinni af því fyrr en 2 árum seinna að hún stæði þar. Sú setning er: Ef þú hefur ekkert gott að segja, þá skaltu bara þegja. Þú skalt nota þetta sem leiðbeinandi skilaboð til þín þennan mánuðinn. Þó þig langi að vera hreinskilinn með margt, þá skaltu eiga suma hluti bara með sjálfum þér, það er þér fyrir bestu – elsku hjartað mitt.

Þótt þú sért rosalega sterkur, þá ertu svo dásamlega viðkvæmur og getur svo auðveldlega orðið móðgaður og sár. Þú verður að skilja að sumt er ekki meint í vondu þótt þú takir það til þín. Þú ert á mjög rísandi tímabili, ert að setja inn mikið sjálfstæði og lífið er að gerast miklu hraðar heldur en þú gerir þér grein fyrir. Þú þarft að sleppa því að vera svona skyldurækinn því þá gleymir þú að sinna þínum löngunum og þörfum. Þú þarft bara að klappa saman höndunum og fagna því að vera svona dásamlegur Fiskur.

Knús og klapp, Sigga Kling

Sigga býður upp á þjónustunámskeið fyrir fyrirtæki af öllum t0ga: Hópefli – hressingarfyrirlestur sem getur verið hentugur í hádegishlé eða í byrjun vinnudags. Einnig tekur hún að sér hópa sem vilja eiga jákvæða og gleðilega kvöldstund. Þeir sem hafa áhuga gefa haft samband við Siggu með því að senda tölvupóst á siggakling@gmail.com