Eggert ráðinn kosningastjóri Framsóknar í Reykjavík

Eggert Skúlason hefur verið ráðinn sem kosningastjóri Framsóknarflokksins í Reykjavíkurkjördæmunum tveimur fyrir komandi þingkosningar.

Eggert greinir frá þessu á Facebook-síðu síðu sinni þar sem hann segir að lífið geti verið litríkt og nú sé það grænt. Vísar hann þar í einkennislit Framsóknarflokksins

„Ég hef áður komið að kosningabaráttu fyrir Sjálfstæðisflokk og Framsókn og einnig unnið með einstaklingum í Samfylkingunni. En þetta verður fjör og stuttur tími. Hlakka til að takast á við þetta verkefni. Eða eins og vinur minn sagði. „Þú ræðst aldrei á garðinn þar sem hann er lægstur.“,“ segir Eggert.

Hann hefur áður starfað sem fréttamaður og almennatengill, en hann lét af starfi sem ritstjóri DV á liðnu sumri.