Hótaði því að láta myrða stuðningsmenn Inter

Þó svo fjölmargir stuðningsmenn Inter séu æfir út í leikmann liðsins, Mauro Icardi, þá mun hann halda fyrirliðabandinu hjá félaginu.

Það staðfesti Inter í dag en mikil pressa var á félaginu að taka bandið af honum eftir mjög umdeildan kafla í ævisögu hans en bókin er nýkomin út.

Þar rifjar Icardi upp atvik frá leiktíðinni 2014-15. Þá tapaði liðið á útivelli gegn Cagliari, 3-1. Eftir leikinn fór Icardi ásamt einum liðsfélaga sínum til þess að ræða við harðkjarna stuðningsmenn liðsins, Svokallaða Ultraz.

Hann afhenti einum ungum stuðningsmanni treyjuna sína eftir spjallið en fékk hana svo aftur í bakið. Þá varð fjandinn laus.

„Það var alger synd að einn Ultraz-gaurinn skildi taka treyjuna af krakkanum og kasta henni aftur í mig. Ég brjálaðist er hann gerði það. Mig langaði að kýla gaurinn sem kastaði treyjunni,“ skrifaði Icardi í bók sína og hélt áfram.

„Ég fór að móðga manninn. Kallaði hann aumingja og öðrum illum nöfnum. Sagði hann ætti að skammast sín sem og allir aðrir sem voru þarna. Þá varð allt vitlaust. Er ég kom inn í klefann á eftir var tekið á móti mér sem hetju.“

Forráðamenn Inter höfðu áhyggjur af þessu og óttuðust að einhverjir stuðningsmannanna myndu reyna að sitja fyrir leikmanninum heima hjá honum.

„Ég sagðist vera tilbúinn að mæta þeim öllum. Þeir vita kannski ekki að ég ólst upp í einu versta hverfi Suður-Ameríku þar sem morð var daglegt brauð. Hvað eru þeir margir? 100? 200? Skiptir engu máli. Ég mun bara koma með 100 glæpamenn frá Argentínu sem munu drepa þá á staðnum.“

Þessi kafli er augljóslega búinn að gera allt brjálað hjá stuðningsmönnunum og þeir eru vafalítið ekki kátir með að Icardi haldi fyrirliðabandinu. Hann mun þó þurfa að greiða sekt.