Alls féllu fimm ný Íslandsmet á Íslandsmóti ÍF í sundi en eitt þeirra setti sundmaðurinn Már Gunnarsson frá ÍBR/Nes á sjálfan 17 ára afmælisdaginn sinn en Már keppir í flokki sjónskertra/blindra (S12).
Fjögur metanna komu úr ranni sundmanna ÍFR þar sem Thelma Björg Björnsdóttir setti tvö ný met, Sandra Sif Gunnarsdóttir eitt og blönduð boðsundsveit ÍFR setti einnig met í 4x50m frjálsri aðferð.
Blandaða boðsundsveit ÍFR nauð liðsinnis goðsagnarinnar Kristínar Rósar Hákonardóttur sem lét til skarar skríða og synti. Þess má geta að með henni í sveit var efnileg sundkona sem heitir Heiður Egilsdóttir en hún og Kristín Rós eru náskyldar.
Íþróttasamband fatlaðra vildi nota tækifærið í fréttatilkynningu sinni og koma á framfæri innilegu þakklæti til þeirra er störfuðu við mótið en þau öll eiga mikið hrós skilið í því að hjálpa að halda svona stórt og flott mót.
Íslandsmet helgarinnar:
Már Gunnarsson, S12 - 400 baksund - 4:57,08 19/11/16
Thelma Björg Björnsdóttir, SB5 - 100 bringusund - 1:54,01 19/11/16
Thelma Björg Björnsdóttir, SB5 - 50 bringusund - 0:53,74 20/11/16
Sandra Sif Gunnarssóttir, S13 - 100 fjórsund - 1:30,78 20/11/16
ÍFR - Blandað - 4x50 frjáls aðferð - 2:47,24 20/11/16
