Völlurinn í Úkraínu "eins og grjót“ | United spilar í kvöld

Keppnisvöllur Zorya Luhansk stóðst skoðun í morgun og mun því leikur liðsins gegn Manchester United í Evrópudeild UEFA fara þar fram eins og ráðgert var.

Völlurinn, sem er í borginni Odessa, var lýst „eins og grjóti“ af Daley Blind, varnarmanni Manchester United, í gær.

Mikill kuldi hefur verið í Odessa en dómararnir sem skoðuðu völlinn í morgun segja að hann hafi skánað mikið í nótt eftir dúkur var lagður yfir hann og heitu lofti blásið undir dúkinn.

„Þetta fer allt eftir veðrinu. Völlurinn er ekki í frábæru ástnadi. En við reiknum með því að hitastigið verði fyrir ofan frostmark, 2-3 gráður, og því ætti þetta að vera í lagi,“ sagði talsmaður Zorya í dag.

Odessa er í 600 km fjarlægð frá Zorya en ekki var hægt að spila leikinn þar vegna átakanna í austurhluta Úkraínu.

Manchester United þarf að minnsta kosti stig í leiknum til að tryggja sér sæti í 32-liða úrslitum keppninnar.