Trump er manneskja ársins hjá TIME

Donald Trump, verðandi Bandaríkjaforseti, hefur verið valinn manneskja ársins hjá bandaríska tímaritinu TIME.

Greint var frá valinu í morgunþætti NBC í morgun.

Tímaritið hefur valið manneskju ársins frá árinu 1927, en sá verður fyrir valinu sem talinn er hafa haft mest áhrif á fréttir ársins, sama hvort það sé til góðs eða ills.

Angela Merkel Þýskalandskanslari var valin manneskja ársins á síðasta ári, en árið 2014 voru það þeir sem börðust gegn útbreiðslu ebóluveirunnar og Frans páfi árið 2013.

Aðrir þeir sem voru tilnefndir í ár voru:

Mark Zuckerberg, stofnandi og forstjóri Facebook

Beyoncé, poppstjarna

Hillary Clinton, forsetaframbjóðandi Demókrata í ár

Vladimir Putin, forseti Rússlands

Uppljóstrararnir í Flint, Michigan sem sviptu hulunni af vatnsskorti í Flint og blýmagni í blóði barna í borginni

Nigel Farage, fyrrverandi formaður Breska sjálfstæðisflokksins UKIP

Simone Biles, fjórfaldur Ólympíugullverðlaunahafi í fimleikum

Narendra Modi, forsætisráðherra Indlands

Rannsakendur CRISPR erfðabreytinga

Recep Tayyip Erdogan, forseti Tyrklands