Fá tækifæri í kvöld til að sýna hvað þær hefðu gert í bikarúrslitaleiknum

Keflavíkurkonur spila í kvöld sinn fyrsta leik sem bikarmeistarar og það er enginn smá leikur því Íslandsmeistarar og fyrrum bikarmeistarar Snæfells koma þá í heimsókn á Sunnubrautina í Keflavík.

Liðin eru í baráttu um deildarmeistaratitilinn við Skallagrím, jöfn að stigum fyrir leikinn með 30 stig hvort eða tveimur stigum minna en topplið Skallagríms.

Leikur Keflavíkur og Snæfells verður sýndur beint á Stöð 2 Sport 3 og hefst útsendingin klukkan 19.05 en leikurinn sjálfur klukkan 19.15.

Keflavík varð bikarmeistari á laugardaginn eftir 65-62 sigur á Skallagrími í úrslitaleiknum. Keflavík var aðeins einu skoti frá því að mæta Snæfellsliðinu í úrslitaleiknum. Skallagrímur vann Snæfell 70-68 í undanúrslitunum þar sem lokaskot Hólmara geigaði en það hefði komið liðinu í úrslitaleikinn.

Snæfellskonur fá því tækifæri í kvöld til að sýna hvað þær hefðu gert í bikarúrslitaleiknum fyrir fjórum dögum síðan.

Þetta er þriðji leikur liðanna á tímabilinu en Snæfell hefur unnið hina tvo þar af þann síðasta leik liðanna í framlengingu í Keflavík.

Vinni Snæfell leikinn í kvöld verður liðin með tveggja stiga forystu á Keflavík auk þess að vera með gulltryggða stöðu í innbyrðisleikjum liðanna í vetur.

Vinni Keflavík leikinn verður staðan orðin 2-1 í innbyrðisleikjum liðanna og því verður innbyrðisstaðan undir í síðasta innbyrðisleik liðanna í Stykkishólmi.