Bróðir Pauls Pogba tilbúinn að sparka hann niður

Florentin Pogba segist vera tilbúinn að sparka bróður sinn, Paul Pogba, niður þegar Saint-Étienne og Manchester United mætast í 32-liða úrslitum Evrópudeildarinnar.

Florentin Pogba hefur leikið með Saint-Étienne frá árinu 2012. Hann er þremur árum eldri en Paul Pogba sem gekk í raðir United fyrir metfé fyrir þetta tímabil.

Fyrri leikur Saint-Étienne og United fer fram á Old Trafford á fimmtudaginn. Florentin segist vera tilbúinn að gera allt til að vinna leikinn, jafnvel þótt bróðir hans sé í veginum.

„Við erum báðir staðfastir leikmenn,“ sagði Florentin.

„Ef hann er á ferðinni og ég þarf að tækla hann, þá geri ég það. Ég mun ekki rota hann en ef ég þarf að brjóta á honum geri ég það.“

Florentin er tvíburi en tvíburabróðir hans, Mathias, spilar með Spörtu í Rotterdam.

Florentin fæddist í Conakry, höfuðborg Gíneu, í ágúst 1990 en Pogba fjölskyldan fluttist til Frakklands þegar Florentin og Mathias voru átta mánaða gamlir.

Florentin leikur með landsliði Gíneu en ekki Frakklands eins og Paul.