Var alltaf að leika fyrir bangsana

Gói heitir fullu nafni Guðjón Davíð Karlsson. Hann bjó til leikritið Fjarskaland sem sýnt er í Þjóðleikhúsinu og fjallar um gömlu ævintýrin. Skyldi hann hafa lesið mikið af ævintýrum sem krakki?

„Já, ég elskaði ævintýri og þjóðsögur. Foreldrar mínir lásu mikið fyrir mig og sögðu mér sögur. Það er kannski ástæðan fyrir því að ég er með ævintýrin á heilanum.“

Hvert þeirra hélst þú mest upp á?

„Ég var alltaf svakalega hrifinn af Eldfærunum og Búkollu.“

Varstu smeykur við eitthvað í ævintýrunum?

„Átján barna faðir í álfheimum er saga sem ég var alltaf pínu smeykur við. Svo fékk ég alltaf kökk í hálsinn þegar ég las Dísu ljósálf.“

Langaði þig einhverntíma að vera sögupersóna í ævintýri? 

„Ekki einhver ein. En ég var oft í ævintýraleikjum og þá var ég Pétur pan, Hans klaufi, því mér fannst hann svo fyndinn, og fleiri.“

Reyndir þú einhverntíma að galdra? 

„Ég reyndi og reyndi. Ég fékk einhverntíman töframannasett í jólagjöf. Það gekk alveg ótrúlega illa hjá mér. En gapi ég alltaf þegar ég sé einhvern gera töfrabrögð.“

Settir þú upp leiksýningar heima hjá þér, sem barn? 

„Stöðugt. Ég var alltaf að leika fyrir bangsana mína. Allskonar ævintýri.“

Máttir þú vera með læti og fíflast þó pabbi þinn væri biskup? 

„Pabbi er prestur og þegar ég var unglingur þá varð hann biskup. En fyrir mér er hann alltaf pabbi minn. Það var mikið grín og gaman á heimilinu. Draumur minn er að verða jafn góður pabbi og hann er.“

Hvaða ævintýri lest þú helst fyrir börnin þín? 

„Við lesum saman allskonar ævintýri. Reynum að lesa sem mest. Þegar ég var að skrifa Fjarskaland þá las ég oft úr því fyrir þau og prófaði suma brandara og fékk hugmyndir að ævintýrum frá þeim. Þau voru svona tilraunadýr.“

Greinin birtist fyrst í Fréttablaðinu 11. febrúar 2017.