Þingmaður biður þjóðina afsökunar vegna stuðnings við United Silicon

Ásmundur Friðriksson, þingmaður Sjálfstæðisflokksins gagnrýndi forsvarsmenn fyrirtækisins United Silicon harðlega á Alþingi í dag. Bað hann íslensku þjóðina afsökunar á því að hafa greitt götu fyrirtækisins á sínum tíma.

„Ég sem þingmaður vill biðja þjóðina afsökunar á því að hafa greitt götur fyrirtækis sem fengið hefur hundruð milljón króna stuðninig skattgreiðenda að byggja upp rekstur en greiðir starfsmönnum sínum laun sem eru grundvölluð á taxta sem er undir tekjuviðmiðum í landinu. Þá hefur fyrirtækið lítil eða enngin tök á mengun frá rekstri fyrirtækisins í Helguvík og er í allskonar málarekstri við verkalýðsforustuna, fyrirtæki og bæjarfélagið og vinnur hvorki með eða fyrir samfélagið,“ sagði Ásmundur á þingi í dag.

Verksmiðja United Silicon í Helguvík hefur mikið verið til umfjöllunar á síðustu vikum og mánuðum, ekki síst eftir að greint var frá því að arsenmengun í grennd við verksmiðjuna er um tuttugufalt meiri en er heimilt samkvæmt starfsleyfi verksmiðjunnar. Vilja yfirvöld í Reykjanesbæ að starfsemi verksmiðjunnar verði stöðvuð þangað til að búið sé að ráðast í þær úrbætur sem þörf er á.

Sjá einnig:„Heilsa íbúa gengur fyrir“

Í ræðu sinni sagði Ásmundur að sér væri illa brugðið að frétta mengunarvandamálum og sviknum loforðum sem hann sagði einkenna upphaf starfseminnar sem hófst seint á síðasta ári.

Rakti hann hvernig fyrirtækið hafði tryggt sér ýmisskonar fyrirgreiðslu með afslætti á sköttum og gjöldum, þar á meðal að fyrirtækið greiddi að hámarki fimmtán prósent tekjuskatt. Þá sagði hann að fyrirtækið greiddi starfsmönnum sínum samkvæmt launataxta sem væri undir tekjuviðmiðum og kæmi sér upp fyrir lágmarkslaun með því að greiða 65 þúsund krónur í bónus á dagvinun á mánuði.

Með því greiddi United Silicon starfsmönnum sínum 450 þúsund krónur á mánuði en sambærileg laun í álverum væru um 6-700 þúsund á mánuði.

„Fyrirtækið sem þannig kemur fram við starfsfólk sitt og samfélag og umhverfi í tráss við gefin loforð á sér ekki bjarta framtíð.“