Reebok Fitness og Sporthúsið opin fyrir því að lyfjaprófa korthafa

Forsvarsmenn líkamsræktarstöðvanna Reebok Fitness og Sporthússins eru jákvæðir fyrir samstarfi við sjálfstætt lyfjaeftirlit um lyfjaprófanir á korthöfum í stöðvum þeirra.

Greint var frá því á Vísi fyrr í mánuðinum að hugmyndir séu uppi um að gera Lyfjaeftirlit Íþrótta- og Ólympíusambands Íslands að sjálfstæðri stofnun. Er það ferli sem er farið að tíðkast víða um heim og hefur alþjóðlyfjaeftirlitsstofnunin WADA mælt með þessu fyrirkomulagi.

Sjá einnig: Steraæði á Íslandi

Með þannig fyrirkomulagi gæti sjálfstæð lyfjaeftirlitsstofnun gert samninga við óháðar íþróttagreinar sem eru ekki keppnisgreinar á Ólympíuleikunum eða innan ÍSÍ.

Slík stofnun gæti gert samninga við líkamsræktarstöðvar og óháðar íþróttagreinar þess efnis að lyfjaeftirlitsstofnunin framkvæmi lyfjapróf á þeim sem eru korthafar.

Yrði fyrirkomulagið þannig að korthafar skrifa undir skilmála þar sem þeir gefa samþykki fyrir því að gangast undir lyfjapróf ef svo ber undir.

Ber skylda til að taka ábyrgð

Guðríður Erla Torfadóttir, framkvæmdastjóri Reebok Fitness, segir í samtali við Vísi að Reebok Fitness hefði fyrir fimm árum sest á fund með ÍSÍ varðandi slíkt samstarf að danskri fyrirmynd, en lyfjaeftirlitið gat á þeim tíma ekki gert samninga við félög eða fyrirtæki utan sambandsins.

„Nú er það hins vegar á dagskránni hjá þeim að skilja sig frá ÍSÍ og þá verður hægt að hefja umræðuna á ný.“

Guðríður Erla segir Reebok Fitness vera mjög opið fyrir slíku samstarfi enda um mikilvægt verkefni að ræða fyrir komandi kynslóðir. „Og okkur ber skylda til að taka ábyrgð í þessum málum. Þetta samstarf myndi passa vel við okkar stefnu að stuðla að heilbrigðum lífsstíl fyrir alla,“ segir Guðríður.

Virðist ekki mega benda á hið augljósa

Hún segist aðspurð verða vör við mikla steranotkun í samfélaginu. „Eins og sést á samfélagsmiðlum þar sem sumar fyrirmyndir nota vöðvaaukandi efni en það virðist ekki mega benda á hið augljósa. Það sem við skynjum því miður er að ungir einstaklingar eru að nota stera og önnur ólögleg efni og virðist sem skammtarnir hafi farið stækkandi. Innan Reebok Fitness verðum við ekki vör við mikla steranotkun þó svo hún sé til staðar eins og á flestum öðrum líkamsræktarstöðvum.“

Lét lyfjaprófa einkaþjálfara

„Það hljómar mjög spennandi að taka þátt í slíku verkefni,“ segir Þröstur Jón Sigurðsson, eigandi Sporthússins, í samtali við Vísi um málið.

Þröstur segist hafa samið við ÍSÍ fyrir nokkrum árum um að láta lyfjaprófa einkaþjálfara í Sporthúsinu handahófskennt.

„Þá voru dregnir út þrír þjálfarar sem fóru svo beint í lyfjapróf. Kostnaðurinn við prófin er verulegur og því hef ég verið hikandi við að gera þetta aftur,“ segir Þröstur.

Vill örugglega enginn reka „stera-stöð"

Hann segist ekki átta sig á því hversu algeng steranotkun er en óttast að hún sé mun algengari en fólk heldur.

„Það er alveg ljóst að það getur enginn rekstraraðili líkamsræktarstöðva viljað hafa þann stimpil á sér að reka „stera-stöð“ ef komið verður á virku eftirlit og lyfjaprófum. Einhverjar stöðvar munu ekki samþykkja að láta prófa sína viðskiptavini og þangað munu þeir sem efnin nota vafalítið leita. Þetta verður þó vonandi til þess að notkunin minnki og óhörðnuð ungmenni leiðist síður út í neyslu,“ segir Þröstur.

Hann er á því að allar stóru líkamsræktarstöðvarnar þurfi að vera með í þessu verkefni ef það á að skila tilætluðum árangri. Hann segir einnig mikilvægt að halda uppi öflugum forvörnum og fræðslu um þessi mál.

„Það er ekkert mikilvægara en að ungmenni og fólk átti sig á því að það er ekki „cool“ að nota stera.“

Tíðkast í Danmörku

Þetta fyrirkomulag, að lyfjaprófa korthafa líkamsræktarstöðva, tíðkast í Danmörku en árið 2014 féllu 152 af 343 sem voru boðaði í lyfjapróf.

Þeir sem féllu mældust annaðhvort með gildi sem sýndu fram á notkun vefaukandi stera eða neituðu einfaldlega að gangast undir prófið. Árið 2012 féllu 104 og 101 árið 2013.

Í umfjöllun Metroexpress í Danmörku kom fram að þar í landi stundi 650 þúsund manns líkamsræktarstöðvar sem hafa gengist undir þessa skilmála danska lyfjaeftirlitsins. Korthafar líkamsræktarstöðva í Danmörku sem falla á lyfjaprófi eru settir í tveggja ára bann.

Skilaboðin þar úti eru skýr, þeir sem nota vefaukandi stera eru ekki velkomnir í líkamsræktarstöðvar en stöðvarnar eru sagðar hafa hag af því að vera hreinar af sterum. Þannig geta þær auglýst sig sem „hreinar stöðvar“ og það sé eitthvað sem sé eftirsóknarvert í augum þeirra sem ekki nota stera.

Ákvæði í skilmálum

Reebok Fitness áskilur sér rétt til að setja viðskiptavini sína í lyfjapróf. Þetta kemur fram í skilmálunum sem þeir sem kaupa sér aðgang að stöðinni skrifa undir. Þar segir að prófið sé framkvæmt samkvæmt reglum og stöðlum Íþrótta- og Ólympíusambands Íslands og að tekið sé mið af bannlista WADA.

Slíkt ákvæði er ekki að finna í skilmálum Sporthússins en samkvæmt upplýsingum þaðan er öll notkun ólöglegra efna þar innanhúss litin hornauga.

World Class er með slíkt ákvæði í sínum skilmálum. Verði einhver uppvís að notkun eða vörslu ólöglegra efna þar verður viðkomandi skilyrðislaust rekinn frá stöðinni. Ef sala eða dreifing á ólöglegum efnum fer fram innan veggja World Class verður málinu umsvifalaust vísað til lögreglu.