Alfreð lagði upp mark í stórsigri

Alfreð Finnbogason lagði upp mark í 4-0 stórsigri Augsburg á Hamburg í þýsku úrvalsdeildinni í dag.

Þetta var gríðarlega mikilvægur sigur fyrir Augsburg sem er komið upp í 13. sæti deildarinnar og er nú tveimur stigum frá fallsæti.

Gamla brýnið Halil Altintop kom Augsburg yfir á 28. mínútu og þremur mínútum fyrir hálfleik bætti hann öðru marki við.

Philipp Max kom Augsburg í 3-0 á 76. mínútu eftir sendingu frá Alfreð og Raúl Bodadilla skoraði svo fjórða markið fimm mínútum fyrir leikslok.

Lokatölur 4-0, Augsburg í vil en liðið hefur unnið tvo af síðustu þremur leikjum sínum.