Taldi sig verða að segja þinginu frá vendingum varðandi Clinton

James Comey, yfirmaður Alríkislögreglu Bandaríkjanna, segir að það hefði mögulega haft skelfilegar afleiðingar ef hann hefði ekki sagt þinginu frá nýjustu vendingum í rannsókn FBI vegna tölvupósta Hillary Clinton skömmu fyrir kosningarnar í fyrra. Hann sagði að honum liði illa yfir því að hann hefði mögulega haft áhrif á kosningarnar.

FBI gæti hins vegar ekki tekið mið af því hvort stjórnmálamenn græddu eða töpuðu á aðgerðum þeirra.

Hillary Clinton sagði í gær að yfirlýsing Comey hefði verið einn þeirra þátta sem hafi spilað lykilhlutverk í því að hann tapaði kosningunum fyrir Donald Trump.

Comey bar í dag vitni fyrir nefnd öldungaþingmanna og samkvæmt AP er enn ljóst, miðað við spurningarnar sem hann fékk, að ákvörðunin sé enn að hafa áhrif á stjórnmálin í Bandaríkjunum.

Sjá einnig: FBI dregið inn í hringiðu stjórnmála

Hann sagði að í raun hefði hann haft tvo kosti þegar starfsmenn hans sögðust hafa fundið tölvupósta á tölvu Anthony Weiner sem mögulega tengdust rannsókn þeirra á Clinton. Hann hefði hins vegar ekki getað sleppt því að ræða við þingið og þá sérstaklega eftir að hann hafði sagt við eiðstaf að rannsókninni væri lokið.

Því tilkynnti hann þinginu, ellefu dögum fyrir kosningarnar, að rannsóknin hefði verið opnuð á nýjan leik.

FBI hóf rannsókn á mögulegum tengslum framboðs Trump við yfirvöld í Rússlandi í júlí í fyrra, en Comey sagði þinginu ekki frá því. Comey staðfesti hins vegar ekki að sú rannsókn væri raunveruleg fyrr en í mars.

Þingmenn Demókrataflokksins sem spurðu hann spurninga á nefndarfundinum í dag kvörtuðu yfir tvöföldu siðgæði hjá Comey, sem hann sagði ekki vera réttmæta gagnrýni. Hann hefði eingöngu sagt að rannsóknin væri í gangi og ekkert tjáð sig frekar um hana fyrr en henni hefði verið lokið. Sama væri á teningnum með rannsóknina á framboði Trump.