Ríkið sýknað af kröfu Sigurðar Einarssonar vegna milljarð króna skattlagningar

Hæstiréttur hefur sýknað íslenska ríkið af kröfu Sigurðar Einarssonar, fyrrverandi stjórnarformanns Kaupþings. Deilt var um hvort skattleggja bæri tekjur af kauprétti á hlutabréfum í bankanum sem Sigurður fékk sem stjórnarlaun eða almenn laun á grundvelli tvísköttunarsamnings milli Íslands og Bretlands.

Héraðsdómur hafði áður dæmt á sama vegu og var dómur héraðsdóms staðfestur af Hæstarétti í dag. Sigurður þarf jafnframt að greiða ríkinu milljón krónur í málsvarnarkostnað.

Tekjur Sigurðar vegna kaupa hans á hlutabréfum í Kaupþingi árin 2006, 2007 og 2008 voru 674 milljónir, 599 milljónir króna og 328 milljónir króna. Nam fjárhæð álagsins 168, 149 og 82 milljónum króna fyrir hvert ár.

Í dómi héraðsdóms sem staðfestur var af Hæstarétti kemur fram að samkvæmt lögum um hlutafélög skuli formaður félagsstjórnar ekki taka að sér önnur störf fyrir félagið en þau sem teljast eðlilegur hluti starfa hans sem stjórnarformanns að undanskildum einstökum verkefnum sem stjórnin felur honum.

„Þau störf sem stefnandi tók að sér að inna samkvæmt ráðningarsamningi ber að skýra með hliðsjón þessu. Helsta verkefni stefnanda var að samræma störf hinna ýmsu alþjóðlegu útibúa og dótturfyrirtækja, gegna starfi stjórnarformanns systur- og dótturfélaga og leita tækifæra til að þróa starfsemi bankans,“ sagði í umfjöllun um dóminn á vefsíðu á heimasíðu ríkisskattstjóra.

Með vísan til þessa taldi héraðsdómur að greiðslur til stefnanda og þar með talin þau hlunnindi sem honum voru veitt með kauprétti á hlutabréfum í bankanum væru hluti af greiðslum til stefnanda fyrir stjórnarsetu í bankanum. Ákvæði 16. gr. tvísköttunarsamnings á milli Íslands og Bretlands kveða á um að greiðslur og hlunnindi fyrir stjórnarsetu skuli skattleggjast í því ríki sem félagið sem greiðir launin er heimilisfast.