De Boer veit ekki hvort hann stýrir næsta leik Crystal Palace

Frank de Boer viðurkennir að hann veit ekki hvort hann verði við stjórnvölinn hjá Crystal Palace þegar liðið mætir Southampton í ensku úrvalsdeildinni á laugardag.

Undir stjóri De Boer hefur Crystal Palace hvorki unnið leik né skorað mark í fyrstu fjórum leikjum sínum á tímabilinu. Þetta er versta byrjun nokkurs félags í efstu deild á Englandi síðan 1924.

Palace tapaði í gær fyrir Burnley, 1-0, þrátt fyrir að hafa spilað ágætlega í leiknum.

„Ég veit það ekki. Ég einbeiti mér bara að því sem ég get stjórnað og ég mun hugsa um Southampton frá og með deginum í dag,“ sagði hann í samtali við enska fjölmiðla.

„Aðrir mega hafa sínar skoðanir en á meðan ég er enn knattspyrnustjóri Crystal Palace mun ég gefa allt mitt í starfið. Frammistaðan í leiknum var ágætur byrjunarpunktur og við sýndum hvað við getum gert. Það gerir mig vongóðan fyrir framtíðina.“

Steve Parish er stjórnarformaður Crystal Palace og virðist ákveðinn í að gefa De Boer meiri tíma. Hann hefur beðið alla hjá félaginu og stuðningsmenn um að standa saman.