Fjögurra stjörnu sóknarlína hjá Liverpool í kvöld?

Sadio Mane, Philippe Coutinho, Roberto Firmino og Mohamed Salah gætu allir verið í byrjunarliði Liverpool í kvöld þegar liðið heimsækir Spartak Moskvu í Meistaradeildinni.

Knattspyrnustjórinn Jürgen Klopp hefur aldrei byrjað með þá fjóra saman í byrjunarliðinu á þessu tímabili en þegar þeir voru í byrjunarliðinu í eitt skipti á undirbúningstímabilinu þá vann Liverpool 3-0 sigur á þýska stórliðinu Bayern München.

Ekki er vitað hvað Klopp gerir og hann gaf ekkert upp á blaðamannafundi fyrir leikinn. „Það verður að vera rétta jafnvægið í liðinu. Við erum sóknar hugsandi lið en þetta snýst um að spila Meistaradeildarfótbolta,“ sagði Jürgen Klopp á blaðamannafundinum. Telegraph velti fyrir sér mögulegu byrjunarliði.

„Við þurfum að ná úrslitum. Menn þurfa að gera það rétta í stöðunni á réttum tímapunktum. Þetta snýst ekki um að setja á svið einhverja sýningu. Þetta snýst um að vera góðir, klára hlutina og klára þá á réttum tíma. Við getum ekki komið með alla listamennina fram í einu en ef það passar fyrir okkar lið þá munum við gera það,“ sagði Klopp.

Allir ættu að vera klárir í bátana. Sadio Mane er búinn að taka út leikbannið sitt og Philippe Coutinho er kominn í leikform eins og hann sýndi með marki og stoðsendingu í sigri á Leicester City um síðustu helgi.

„Leikurinn á móti Bayern var góður leikur hjá okkur en það er langt síðan hann var. Ég gerði mér ekki grein fyrir því fyrr en þú sagðir mér það að þetta hafi verið eini leikurinn þar sem þeir hafa allir byrjað,“ sagði Klopp þegar staðreyndin um stjörnurnar fjórar var borin undir hann.

Hvort blaðamaðurinn á Telegraph hafi gefið honum góða hugmynd kemur ekki í ljós fyrr en í kvöld.