Sigmundur telur að um samsæri sé að ræða

Sigmundur Davíð Gunnlaugsson, formaður Miðflokksins, telur enga tilviljun að nú sé komin fram frétt í RÚV að nafn hans sé í gögnum sem þýska alríkislögreglan hefur miðlað til íslenskra yfirvalda.

RÚV birti í morgun frétt sem segir um sé að ræða upplýsingar um málefni Sigmundar Davíðs sem byggir á rannsóknum hennar á Panama-skjölunum. Vísað er til greinar í Süddeutsche Zeitung, sem fjallar um lögregluaðgerðir á grundvelli upplýsinga sem finna má í skjölunum, sem þýsk yfirvöld ákváðu í sumar að kaupa á fimm milljónir evra, eða 625 milljóna íslenskra króna.

„Ekki kemur fram í grein Söddeutsche Zeitung hvaða upplýsingar um Sigmund þetta eru, hvort þær séu nýjar eða hvaða yfirvöld hér landi fengu þær í hendur. Ekki er hins vegar annað að skilja á fréttum af gagnakaupum Þjóðverja í sumar en að þar sé mestmegnis um að ræða sömu gögn og íslenska ríkið ákvað að kaupa á 37 milljónir í apríl 2015 og fjölmiðlar fjölluðu svo um í apríl í fyrra. Í þeirri umfjöllun kom fram að Sigmundur og kona hans, Anna Sigríður Pálsdóttir, hefðu átt eignir í félaginu Wintris á Bresku Jómfrúreyjum,“ segir í frétt RÚV. (Vert er að benda á að þarna hefur misritun átt sér stað en eiginkona Sigmundar heitir Anna Sigurlaug.)

Sigmundur Davíð hefur þegar brugðist við þessum tíðindum á Facebooksíðu sinni og í hans huga leikur enginn vafi á um að þarna sé um samsæri gegn sér að ræða.

„Er líklegt að það sé tilviljun að einmitt núna birtist gömla frétt um að nafnið mitt hafi verið meðal þeirra milljóna nafna sem var að finna í gögnum sem þýska ríkið keypti 2015?“ spyr Sigmundur Davíð.

Hann Þjóðverjana hafa sent upplýsingar úr gögnunum sem þeir keyptu á sínum tíma til viðeigandi landa. „Við á Íslandi hefðum reyndar ekki þurft sendinguna frá þeim vegna þess að ríkisstjórn mín var búin að láta kaupa þann hluta þessara gagna sem vörðuðu Íslendinga.“